France-i kiralongrartem nungita yarir: Assad

Prague, December 01 (Agencies): France sorkari kiralongrartem nungita yarir ta shia, Syria Tir, Bashar al-Assad-i France aitsüba olen ka tanü Mongolbar nü metetdaktsüogo.

Ano, küm 4 tejaklen nungi tenzüka par Syria nung adokba mangatettep ken o bentettsü asoshi yimjung tezüngzüktep agitsü tesem tajungtibaji Czech Republic yimtiba, Prague asütsü ta pai ashi.

Czech Republic Tir, Milos Zeman-i taküm September ita benokba ama, Syria’er yimjung tezüngzüktep Prague yimti nung agitsü asü? ta osangbenertemi asüngdangdang, “Hau, Syria yimjung tezüngzüktep agitsü asoshi Prague ya tapet yimti ka asütsü kechiyong Czech Republic linüki tanü tashi Syria pusema mesüra anema mali,” ta Assad-i langzük.

“Ajisüaka, kasa tasüngdangbaji Syria sorkar anemertem dang asüngdangra, parnoki France linük tapetba ta lanzütsü kechiyong France linüki kiralongrartem nungita yarir,” ta pai shisem.

Syria’er mangatettep ken o bentetja par linük nung yimji yimjung lidaktsütsü nükjidong nung US aser European Union (EU) nati Czech Republic linük nung Syria sorkar lenirtem den ajurutepa nungdakba senden amen tenzükba osanga jangjaogo.

Ajisüaka, “Assad ya nisung tepsetter tetsüti lir,” ta shia, Assad-i Syria Tir menden toktsüba ajanga dang alimai Islamic State (IS) telok madak takok ngua raratettsü ta France Foreign Minister, Laurent Fabius-ia yashi Hombar nü metetdaktsüogo.