Afghan Tir, Ghani-i Pak den sentaktepshitsü alizüng ayur

Kabul, December 01 (Agencies): Afghanistan linüki tarutsü mapang nung kidangsüa aliba Pakistan linük den sentaktepshia par linük ana tsüngda tesendaktep tajungba küma yanglushitsü sentong aliba olen ka Afghanistan Tir, Ashraf Ghani-i tanü Mongolbar nü metetdaktsüogo.

Ano, Taliban telungpur telok dena tang anendaka aliba yimjung nung alitsü senden maneni mena par telok den yimjung tezüngzüktep agitsü alizüng ayuba osang ka pai lemsatepa liasü.

Ghani-i Pakistan Ato Kilonser, Nawaz Sharif den tang Paris yimti nung temendak Climate Change senden tezülen yashi Hombar nü ajurutepa liasü.

“Pakistan-i par linük semdangtsü jaokba ama Pakistan semdangtsü sentong yanglu tenzükogo,” ta shia, par Afghanistan aser Taliban telok na tsüngda asangsang nung yimjung tezüngzüktep agitsü maparen nung Pakistan-i tongti shilem agitsü imlaba olen ka Ghani-i metetdaktsü.

“Pakistan-i tongti shilem agiba ajanga ozü Afghan sorkar aser Taliban telungpur telok na tsüngda teti atema yimjung tezüngzüktep asangsang nung agitettsü,” ta paisa shisem.

Afghanistan sorkar aser Taliban telungpur na tsüngda adokba mangatettepbaren agiena par telok ana tsüngda yimtenren tebentetbaren agitsü asoshi United States o China natia Afghanistan sorkar ajungshiogo.

Pakistan-i ayongba sülen Afghan sorkar aser Taliban telungpur na tsüngda yimjung nung alitsü senden amen tenzük saka Taliban lenisang, Mullah Mohamad Omar küm 2 tejaklen asüba osang sangoktsüba sülen Taliban teloki Afghan sorkar den yimjung senden mamentsü lemtetba osang ka taküm 2015 küm June ita sangoktsüba ajanga par telok anati tanü tashi yimjung senden mementeti lir.

Ano, Pakistan-i Taliban telok pusema parnok yarir ta shia, Afghanistan-i Pakistan dak temulung melemteti aliba osang bushitetogo.

Ajisüaka, Pakistan-i yamaji meinyaker ta shia, par linük ana tsüngda tesendaktep tang mejungi lir.