Taoba PM, Kabore-i Burkina Faso Tir election kokogo

Ouagadougou, December 01 (Agencies): Taoba Burkina Faso Ato Kilonser, Roch Marc Christian Kabore-i Burkina Faso Tir election nung takok ngua Tir tasenba akümtsü jenjang nguogo.

Mitkar lenirtemi par lenisang tashiyim agi yimsüsütsü menden nungi anenja linük indang yimsüsü tashi tashiyim agi benoktsü merangba densema, Burkina Faso linüki küm 1 shi tensa tamajung ajuruba sülen Kabore-i tan election nung takok ngua Tir menden abentsü jenjang ya ajangzüker lir.

Kabore-i tan agiba election nung vote noklang nung shilem 53.49 shi ngua tan jenjang tajung ya angu.

“Asen linük jenjang tajungba kümdaktsütsü asoshi asenok ajaki lungjemer inyakteptsü ayongzüker. Asenoki tanü bendanga agüja inyakba ajanga asüng jenjang tajunga akümtsü,” ta Kabore-i tanü metetdaktsü.

Tan election nung vote shilem 21.65 shi ngua tanabuba jenjang angur, Zephirin Diabre-ia Kabore-i Tir tasenba akümtsü jenjang tajung ajangzükba atema pelaba olen ka metetdaktsüogo.

Küm 30 shi nung Burkina linüki tan mezüngsüa election agia par lenisang shimtettsüsa bendanga agüja inyakba atema Burkina election ketdangsertem den pelaba olen ka Kabore-isa tanü metetdakja liasü.

Burkina linük madak küm 27 tashi yimsü asüsang, taoba Tir, Campaore-i maneni yimsü asütsü nükjidong nung linük temzüng melenshitsü merangba ngua nüburtemi pa Tir menden nungi 2014 küm October ita anentsüba sülen par Burkina linük nung tensa mejungi aruba osang bushitetogo.