Turkey o Russia nati arok arrür den raratsü ajungshir: Obama

US Tir, Barack Obama (Achijilen)-i Turkey Tir, Recep Tayyip Erdogan den France kübok Paris yimti nung tanü Mongolbar nü ajuruba noksa nung angur. (Paris, December 01)

 Paris, December 01 (Agencies): Turkey o Russia nati külemi lungjemer arok arrür, Islamic State (IS) kiralongrar telok anema raratsü tajungshiba olen ka US Tir, Barack Obama-i tanü Mongolbar nü metetdaktsüogo.

Turkey-i Russia’er tayimtsü ka hopta ka tejaklen anüng tom nungi kazüka yokba sülen Turkey aser Russia na tsüngda tesendaktep mejungi akümtsü tenzükba mapang ka nung Obama-i tan iba tajungshiba olen ya sangoktsür lir.

“IS telok ya asen ajunga indang arok arrür lir. Anungji, asenoki ka küma külemi lungjemer IS telok meshimeshia samatsütsü ajungshir. IS telok meshimeshia samatsüba ajanga Syria nung yimtenren tebentetbaren asangsang nung bener arutsütettsü,” ta Obama-i tanü ashi.

Tang Paris nung temendak United Nations Climate Change Conference senden tezülen Turkey Tir, Recep Tayyip Erdogan den ajurutepa tanü jurila senden ka amenba sülen Obama-i iba olenji metetdaktsü.

Par lushi telung nung ayimba yong Russia’er SU-24 fighter jet tayimtsüji anüng tom nungi kazüka yok ta shia, kasaji kazüka yokba atema Russia dang taidok memeshitsü lemtetba osang ka Turkey-i yashi, Hombar nü metetdaktsü.

Ajisüaka, par tayimtsü Turkey lushi telungi mai ta shia, Russia-i tang Turkey anema rongsenren tenokdangba sentong benoka par linük ana tsüngda tesendaktep mejungi küma lir.

“Turkey-i par lushi aser anüng kümzüka ayutsü asoshi inyakba maparen US-ia nungita pusemer. Ano, Turkey linük aser par peisasa pei madak yimsü asütsü temeten kümzüka ayutsü maparen nung US-i maneni nungita yaritsü renema lir,” ta Obama-i tanü Erdogan den lemsatep.

“Ozü linük densemba tesem nung tensa mejungi melidaktsüner anungji, alima tashi abenba linüktemi mangatettep ken o bentetja tensa azüoktsü ajungshir,” ta Erdogan-ia metetdaktsü.

Obama-i yashi, Hombar nüa Russia Tir, Vladimir Putin den ajurutepa Syria nung adokba mangatettep ken o aser IS kiralongrar telok den sentakba tongti onük benokba osanga jangjaogo.

Ano, Turkey-i anüng tom nungi kazüka yokba ajanga par tayimtsü anishir 2 tashi taküm samaba atema sasaba olen ka lemsatepba den külemi, Turkey den sendaktepshitsü tajungshiba olen ka Obama-i lemsatepa liasü.