Bomb ana apokba ajanga 50 pokset

Abuja, July 17 (Agencies): Hokolbar nü Nigeria nung muslim nunger sarasademba moapu ka nung bomb ana apokdang nisung 50 tashi pokset, ta ketdangsertemi metetdaktsü.

Nigeria yimtiba Damaturu nung yimti nüburtem ita ka lumiba sülen amungba Eid benjung atema sarasademtsü sentepba mapang iba lendong ataloka liasü, ta Xinhua news agency ajanga metetdaktsü.

Nigeria army meyong otongdar, Col. Sani Usman-i ashiba agi, anepdang 7:40 ako meta Layin Gwange, central Damaturu nung Islam amangertem sarasademtsü sentepa lia mezüng bomb apokdang nisung 43 asü.

Tanabuba bombji mezüng bomb poker minute ana dang lir külen apok aser iba mapang nisung 7 pokset aser aika yiru, ta pai ashi.

Usman-isa ashiba agi, pei mang nung bomb alenloker taküm bendanga agütsür tetsür anati item bomb ana ya apok. Mezüng buba bomb ji tetsür tain kati apok aser tanabuba bomb ji tetsür arishi küm 10 kati apok.

Iba lendong ya kechiba agütsü, ibaji ano mejangjai lir. Yimti nung alirtemibo iba lendong ya Boko Haram teloki lir, ta tongloktsüogo.

2009 küm nungi Africa nung netsüng timtiba aliba linük, Nigeria tesem balala nung Boko Haram teloki nisüng 13,000 tashi taküm lalutsüogo.

Nigiria nung ketdangsertemi par linük tensa tajungba küma azüoktsü asoshi national aser international teyari nüngdanger.