Nuclear inyakyim ajanga linük nung amalitep adoktsü:Iran

Dubai, July 17 (Agencies): Iran aser P5+1 na nuclear ken o tajungba nung tembangba sülen Iran-i, iba ya ajanga Middle East aser linük ajak nung amalitep tajung ka adoktsü, ta Hokolbar nü Muslim linüktem dang ashi.

Foreign Minister Mohammad Javad Zarif-i, Islam amangertem ita piyong lumiba sülen Eid al-Fitr amungtsü lia, Islam aser Arab linük tem dangi iba osang ya yok, ta ministry meyong website ajanga ashi.

“Iba nuclear ken o tanginüba ama tembangba ajanga Muslim linük aser international den amalitep lenmang tasen ka lapokogo, ta Zarif-i ashi.

Eid sodi temer külen Zarif ya Gulf linük temi aotsü sentong lir, ta Brihostibar nü Foreign Ministry meyong otongdar Marzieh Afkham-i IRNA osangbenertem dang ashi.

Lai ashiba agi, Iran-i Muslim linüktem aser anasa aliba linüktem den tesendaktep akhanga ayutsü temulungtetba tulu lir. Sunni Muslim Gulf Arab states-a item linüktem rongnung ka lir.

P5+1 aser Iran na tsüngda nuclear ken o küm ter dak tema atsütepa arurba sülen tan taoba Mongulbar nü ang tembanga liasü.

British Ato Kilonser David Cameron den Iran Tir Hassan Rouhani-i telephone ajanga jembidang ashiba agi, Iran o Britain na tsüngda tangatettep tajung ka lia maparen inyaktepdi. Iba den külemi shibanger aliba embassy tema lapokshidi, ta Rouhani-i ashiba IRNA osang kaket ajanga metetdaktsü.

2011 November ita nung Tehran nung aliba Britian nunger embassy-i Iran nunger lungkak aiter noklang aika nungoka aitba sülen shibanga liasü.

Cameron-i Islamic State in Iraq & Syria (ISIS) den raratsü asoshi tuteta ashi, ta IRNA osang kaket ajangasa metetdaktsü.

“Asenoki metet ner tesem asoshi ISIS ya kanga tetsübutsü ka lir aser asenoki parnok nokdangtsü nüngdak,” ta Cameron-i ashiba IRNA osang ajanga ashi.