Netaji indang file 134 sangdongtsü reprangshidar: Centre

New Delhi, December 02 (Agencies): Sorkar ket nung Netaji Subhas Chandra Bose indang mesangdongi aliba file 134 lir, aser itemji sangdongtsü atema tang reprangshidar, ta tanü sorkari Rajya Sabha nung metetdaktsü.

Minister of State for Home Affairs, Haribhai Parathibhai Chaudhary-i, “Sorkar ket nung aliba file ajak sorkari reprangshidar, aser kasaji sangdongtsü,” ta ashi.

“Tanü tashi nung nguteta alibaji, Ministry of Home Affairs ket nung file 12 lir. Item file 12 rongnung file asem mesangdongi lir aser file teku sangdongogo,” ta minister-i ashi.

Paisa, Prime Minister’s Office nunga file 58 lir, aser item rongnung file 41 mesangdong aser file 17 sangdongogo aser Ministry of External Affairs ket nung Netaji dak sentakba file 90 mesangdongi lir, ta ashi.

Paisa, Defence Ministry ket nung aliba Indian National Army dak sentakba mesangdongba records (file 990) sangdongogo aser 1997 küm New Delhi, Janpath, National Archives of India ket nung agütsüogo, ta shisem.