Hornbill Fest : World War II Peace Rally agi; NEZCC sentong tenzük

Dimapur, December 2 (TYO) : Hornbill Festival tenzüker anogo tanabuba nung Nagaland Adventure & Motor Sports Association (NAMSA)-i Department of Tourism den yaritepa 6 buba World War II Peace Rally tenzük.
Bodbarnü Dimapur Stadium nung DABA Youth Director, Imnatoshi-i temoatsü meshia sarasademtsüba sülen Asangba Chuba Ao, IAS, Commissioner of Taxes-i WWII Peace Rally tenzüktsü.
Tetsükdaktsütem ajuruaka iba sentong ayongzüka agiba atema tayonger nem tenüngsang agütsür, ta Commissioner of Taxes, Asangba Chuba Ao-i o tatsüka jembidang ashi.
Iba sentong ya temulung sadoka jangra atemtsü atema dang masü saka iba sentong ajanga asen state nung aser linük nung yimjung aser telongjem osang prokshitsüla, ta paisa shisem.
Tanü Dimapur Stadium nungi vintage WW II Jeep 12 jungnüa Kisama-i apusoa liasü.
Kisama Heritage Village atongba sülen World War II Peace Rally finale nung Andrew Ahoto-i tan agi tasembenbuba atongtepa ‘best original car’ sempet agizük.
Iba shilem nung S. Lanu Jamir-i tanabuba jenjang takok angu. Tetoktepba nungsa Tovika-i best Dressed Unit, Andrew Ahato-i best Weaponry aser Asanuo-i Women Unit takoktem angu aser Fisheries Parliamentary Secretary, Shetoyi Sumi nem most Disciplined Unit takok agütsü.
Iba sentong nung Tourism Parliamentary Secretary, C. Apok Jamir aser Art & Culture Parliamentary Secretary, Eshak Konyak nati takoker nem sempettem agütsü.
Battle of Kohima bilemtettsü atema aser yimjung o telongjem osang sangdongtsü nükjidong nung World War II Peace Rally ya Hornbill Festival nung ayongzüka agir.
“Farthest Field” kaket saya: Tanü Hornbill Literature Festival 2015 nung Art & Culture Parliamentary Secretary, Eshak Konyak-i kaketzülur Raghu Karnath indang “Farthest Field” kaket sayatsü.
Iba kaket ya Imphal aser Kohima rara nung ajemdaker züluba lir aser World War II Peace Rally den külemi iba kaket sayaogo.
Raghu Karnath-i ashiba agi, küm asem tejaklen tashibo pa puti otsü bushir ka masü liasü, saka pa tebu tanubo Bobby indang taküm otsü ajanga pa puti otsü bushir ka akümtsü ajungmeso.
Pa tebu tanuboji 1942 küm British Army nung engineer ka ama züngsem aküm aser iba nung ajemdaker pai World War II indang puti otsü zülutsü ajungmeso, ta Raghu-i ashi.
Kohima aser Imphal rara nung shilem agirtem aika kidangi meyipa maru aser mapang talangka lir külen ang Imphal Commonwealth War Grave cemetery nung Bobby indang leper angu, ta paisa metetdaktsü.
NEZCC : December 2, 2015 nü North East Zone Cultural Centre (NEZCC), Dimapur-i linük nung zone balala nungi yartsüngsangba aser sobaliba sentong agitsü tenzükogo.
NEZCC ya 1985 küm taoba India Prime Minister asür Rajiv Gandhi-i tenzüktsüba lir. NEZCC indang mapa tongtipangbaji tezüluba nung asen maitsü wazüka ayutsü atema lir.
Tanü mezüng anogo nung Assam nungi Bihu tsüngsangi sentong tenzük aser iba sülen Arunachal Pradesh, Odisha, Meghalaya, Andhra Pradesh, Manipur aser Punjab nungi yartsüngsangertemi shilem agi. Tatem nung parnok ajak longjemer yartsüngsanga liasü.