India nung Zonal cultural centre 4-i Hornbill Festival nung shilem agi

Kohima, December 2 (TYO): Bodbarnü Naga Heritage Village Kisama nung India kübok zonal cultural centre pezü longjemer pei sobaliba sayuogo.
Hornbill Festival anogo tanabuba nung North East Zone Cultural Centre (NEZCC), Dimapur-i iba sentong ayongzüka agi.
Kümshia Hornbill Festival nung anogo tanabubaji North East Day ta ser amunger aser iba sentong nung North East state 8 nungi sobaliba shilem balala agir. Ajisüaka, taküm NEZCC-i linük kübok aliba zonal cultural centre 4 tashi longjemer sentong ayongzüka agi.
Tanü agiba sentong nung Eastern Zonal Cultural Centre Kolkota tenüng nungi Odisha-i Sambhalpuri tsüngsang ajanga shilem agi. Ano, North Zone Cultural Centre Patiala tenüng nungi Punjab-i Bhangra tsüngsang aser South Zone Cultural Centre Thanjavur tenüng nungi Andhra Pradesh-i Tappetagullu tsüngsang ajanga shilem agia liasü.
Sentong nung NEZCC Dimapur tenüng nungi Assam-i Bihu tsüngsang, Arunachal Pradesh-i Eme-Relo tsüngsang aser Meghalaya-i aluruba tsüngsang ajanga shilem agi.
Tourism Department ketdangser kati ashiba agi, Hornbill Festival mezüng anogo nung nisung 22,740 aru aser parnok rongnung bendanger 180, domestic tourist 2560 aser local nisung 20,000 shi liasü.