Sorkari UP nung Naga kaketshirtem scholarship agütsüogo: Deo

Kohima, December 02 (TYO): Tanü Nagaland sorkari, Uttar Pradesh, Modinagar nung engineering & technology college nung B Tech aser MBA course agir Naga nunger kaketshirtem scholarship atema sen 9,32,700 agütsüogo, ta ashi.
Bodhbar nikongdang Kohima nung osangbenertem den jembidang Higher & Technical Education Parliamentary Secretary, Deo Nukhu-i, “Naga nunger kaketshir 150 nungi 107 scholarship atema onoki sen 9,32,700 agütsüogo, tanüngba kaketshir 43 nembo magütsü, kechiyong parnok rongnung kar bank account junga maliasü aser karbo angutsü metemsüi liasü,” ta ashi.
Naga nunger kaketshir 150-i UP, Modinagar nung aliba Divya Jyoti Institute of Engineering and Technology toktsübaji state sorkar tai ajanga lir ta tai tongloktsüba amaji masü ta paisa shiogo.
“Kaketshirtemji Eastern Naga Students Union Dimapur (ENSUD)-i Divya Jyoti Group of Institutes (DJGI) aser tanga institutes, Delhi-NCR den yaküm tezüngzüktep agiba sülen Institute jagi yok,” ta Deo-isa ashi.
“State sorkar mesüra Technical Education department-i ibaji memeteti liasü aser ENSUD mesüra DJGI-ia ibaji kodanga memetetdaktsü,” ta paisa ashi.
Kaketshirtem admission agibaji parnok sasa lemteta agiba liasü, ta paisa shisem.
“Kaketshirtem ajak scholarship angutsü aser re-imbursement atema khuretji DJGI den ENSUD-i yaritepa abentsü, aser kaketshir (tem) scholarship mengura kaketshirtem course metembang tashi DJGI-i tanga lenmang kar bushitsü,” ta April 10, 2014 nü ENSUD aser DJGI na tsüngda tezüngzüktep agiba onük ka nung shia lir.
Osangbenertem senden nungji Technical Education Department-i tezüngzüktep (MOU) agiba copy ji ka osangbenertem dang sayu.
“Anungji Naga nunger kaketshirem Divya Jyoti Institute of Engineering & Technology nungi meyipa aruba taiji state sorkar mesüra department nem metongloktsütsüla,” ta Parliamentary Secretary-isa metetdaktsü.
Deo Nukhu-isa, department-i iba onük ajungaji jungjunga bushisüngdangba sülen Institute aser ENSUD dak ozüngi melaba ama mapa inyaktsü, ta metetdaktsü.
Tazüngba tom nung züngtor meyipa arur kaketshir 150 tia indang asüngdangba langzüdang Nukhu-i, “tangtangbo onoki kecha menangzüktettsü,” ta ashi.
Nukhu-isa nemjema, Naga Students’ Federation (NSF) densema kaketshir tentet aikati Department nem memetetdaktsüi mesüra asüngdangya mesüi state adener reju balala den densema angati shisaliok dak sentakba programme tem maparen inyaker, ajisüaka kodang timtem ajurudir parnoki sorkar nem tai tongloktsür, aser ibaji tim masü, ta ashi.