Kenübo restaurant ka lapoktsü imlar: Malaika Arora

December 03, 2015 : Malaika Arora Khan ya mezüngbo model liasü aser iba sülen actress, producer aser sentong ketdangser ka aküm. Ajisüaka la ano fashion den sentaktepa restaurant ka lapokner.

“Ni bilemba atongtsü talangka lir. Anogo shia kü tebilemba tashi taitba akümer ajisüaka ataloktsü asoshi mapang agitsü. Ni mapa aika inyaktsü jangrara, kenübo restaurant ka lapoktsü kü teimla lir,” ta Malaika Arora-i sangdong ka ajanga ashi.

“Ni chiyungtsü kanga sapur. Ni chiyungtsü den fashion densemba inyakyim tasen ka bener aruner kechiba süra ana ya mepila,” ta la shisem.

Chat show “Born Stylish” sentong nung ketdangser Pria Kataaria Puri den sensaksemba mapang Malaika-i la jangrabatem lemsatepa liasü. Iba sentong ya Colors Infinity aser Vh1 channel na nung yoker aser tan Honibarnü la adenba sentong yoktsü.

Lai “Munni badnam hui”, “Anarkali disco chali” aser “Hoth rasiley” kentem nung tsüngsanga liasü aser la teti kanga tobur junga renemer dang alir.

Malaika ya kaket zülur tejen, Salim Khan’er jabaso Arbaaz Khan den kibong aküm.

Lai, kinüngbo’er kinungertemi lai inyakba nung kodanga tebang mait aser teti yaria nungiter, ta ashi.

“Kinungbo’er kinungertemi tangar dang tuluba makümer aser shinga nema mapa kecha kangshia melemzüktsür. Parnoki kari inyakba nung tasü aitsü o jembia yarir aser nungitteper. Ni kodang ken nung shilem agidir kinungbo tebu o tetsü nati, “tenü na kanga junga angur, nai kanga junga tsüngsangogo” ta ashir. Anungji mapa balala inyaktsü asoshi kecha arendaka malir, ta lai ashi.

“Fashion asoshi ni kecha arendaka mali. Kü temang kechi koma ka asüyonga ni suboba süoshitem agi kü dak tura ni kecha shisa mebulur,” ta laisa ashi.

Malaika-i kinungbu’er kibong tushia jembiba dang masü saka tensa tajung tamajung ajak nung la den yaritepba asoshi kinungbo dang pelaba lemsatepa liasü.

“Küna kibong kümer külen tatalokba aika ajuruogo aser liyonga arudang tatalokba tajung aser tamajung ajang nung pai ni kanga nungiter,” ta lai ashi.

“Pai ni menungit asübo ni inyakbatem nung terenlok aser tajangzük majurula. Teburi amokbanger aliba lokti ka nung iba ama kinungbo ka angutsü kanga tasak aser pai kodanga kü mapa mesongtem,” ta lai shisem.

“Pai ni sadema yutsü. Pai kü dang na ano küm nung tanur aser nai mapa balala inyakner aser nia nü mapa reprangdangner ta shia kü tebilembatem inyaktsü menokdanger,” ta lai ashi.

Reality TV show “Power Couple” nung tena külemi ketdangser kaka ama shilem agitsü sentong lir.