Syria: Parlaiment-i melaba sülen Britain-i IS anema rara tenzüker

Nicosia, December 03 (Agencies): Britain Parliament-i Syria nung tentetba Islamic State (IS) kiralongrar telok anema raratsü temelaba agütsüba sülen Britain-i par mitkar tayimtsütem yoka Syria nung IS telok teseptem amaktsü tenzükogo.

IS anema raratsü temelaba ngur ghonda ishika lir külen Britain-i Cyprus nung tentetba Akrotiri Air Base nungi par Royal Air Force Tornado fighter jet tayimtsütem Syria tonga yoka idakji tesep tentetba IS anema tanü Brehostibar nü amakba osang jangjaogo.

“Ozü mitkar tayimtsütemi IS teloki tashiyim agi agiba Syria kübok Omar totzü tutetdak amaktsü tenzükogo,” ta Britain defense ministry-i metetdaktsü.

Ajisüaka, tanü amakba maparenji kechi tashi inyak iba osang tejangjabo parnoki memetetdaktsü.

“IS anema raratsü asoshi shimba tesep, Akrotiri Air Base-i ozü mitkar tayimtsü 8 tashi maneni yoksemtsü renemogo,” ta ministry-isa ashi.

Parliament yimsüsürtemi ghonda 10 shi olemtepba sülen parnok 397 tashi par Ato Kilonser, David Cameron-i benokba onük agizüka par mitkar tayimtsütem yoka Syria nung tentetba IS telok anema raratsü temelaba agüja liasü.

Taoba küm 1 tejaklen nungi tenzüka Britain-i alima teloktep mitkartem den yaritepa Syria den kidangsüa aliba Iraq linük nung tesep tentetba IS telok anema raraba osang bushiteta lir.