IS nokdangtsü, saka BJP-i Muslim anema inyakba anentsüla: Shia

Bengaluru, December 03 (Agencies): Brihostibar nü Shia tongti tentet kati, linük nung ISIS maparen nokdangtsü atema Muslim nungeri sorkar yaritsü melunga lir, saka Muslim nunger anema o mekümdangi jembir BJP lenirtem aser BJP MP tem ajak Ato kilonser Narendra Modi-i azüoktsüla, ta shiogo.

“Onok Centre sorkar den lir. ISIS nokdangtsü aser India nung kiralongraba nokdangtsü atema onoki pusemtsü aser osangtsüsang agütsütsü,” ta Anjuman-E-Imamia Tir, Syed Zamin Raza-i ashi.

Tanü Bengaluru nung osangbenertem den jembidang Zamin Raza-i, “Onokisa Ato kilonser dang Muslim nunger anema tamajung jembir par MP tem aser lenirtem azüokdaktsüner,” ta ashi.

Raza-i, ISIS nungji Islamic tamangba kecha sentaktepa mali, Isamic State aser par mapatemji temenen, aser parnok mapatemji Muslim yimsü den mapet, ta ashi.

Karbala rara nung taküm bendanga agüja asürtem bilemtetba sentong tembangba sülen osangbenertem den jembidang pai, Muslim nunger jashitsüsa jembiba o ajanga India nung ISIS anema mapa tajung inyaktsü aliba nung timtem adoktsü, ta ashi.

“Muslim nunger anema minute ka o tamajung jembiba ajanga linük nung ISIS mapatem nokdangtsü mapa tajung nung timtem adoktsü,” ta pai ashi.