Nagaland Post küm 25 ajungba mong among

Dimapur, Dec. 03 (TYO): Nagaland nung mezüng anogo shi adokba osangkaket ‘Nagaland Post’ Brehostibar nü küm 25 ajungba Silver Jubilee sentong ka yangi Dimapur nung Oasis ta ajaba tesem nung kanga longsoa mongogo. Iba sentong nung Nagaland Angh, P.B.Acharya tongti tesemdanger liasü.
Iba sentong nung Nagaland Post yimozülur Wb.Geoffery Yaden aser pa den külem inyakertem nem tenüngsang agüja jembidang, iba osangkaket ajanga Nagaland nung nübortemi ajuruba tebilemtsütem metetdakja inyakba ajanga loktiliba nung tajangzük tulu agüja arudagi, ta anghisa metetdaktsü. ” Wb.Geoffery Yadeni pongmang dang pongmanger masü saka pai pongmangba pongmangji asangsang nung mapa küma inyaker,” ta Acharyaisa metetdaktsü. Paisa Nagaland Post yimozülur aser kibur dang Nagaland nung private television channel ka lapoktsü asoshi ajungshia liasü.
Iba kasa sentong nungsa, Chief Minister, Nagaland T.R. Zeliang-ia tenüngsang agüja jembidang, Nagaland Post yimozüluri kecha metsübui tensa tajung tamajung ajak kokteta küm 25 tashi takok ngua inyaka aruogo, ta metetdaktsü.
Paisa Nagaland Post yimozülur dang ano tarutsü anogotem nunga maneni kasa mapa nung takok ngua inyaka aotsü asoshi lanurtem anitettsü ajungshia liasü. Paisa osangbenertem dang, osangkaket nung adoktsü atema osang yangludang, tebilemba agi masü, saka tejangja osangtsüsang agiteper külenang adoktsüla ta metetdaktsü.
Osangkaket adoktsü shimtetba ya, Geoffery Yadeni mapa shitak ka shimtetogo, iba jagi pai temulungtetba aser tejangraba tulu nung kanga ajemalua inyaker, ta T.R.Zeliangisa metetdaktsü.
Iba kasa sentong nung Nagaland Post yimozülur, Geoffery Yadenia taoba küm 25 tsüngdang pai ajangshibatem indang telok den lemsatep aser Nagaland Post azüngertem ajak dang pelaba metetdaktsü.
Küm 25 jakdang, Nagaland nung hopta nung ken adokba osangkakettem dak alaka anogo shi adokba osangkaket mali asü, iba jagi Nagaland osang tanga state nungi adokba osangkaket nung azüngdang aiben meshitak adok, iba jagi balaka anogo shia adokba osangkaket ka adoktsü mulungtet, ibai tanga kecha nükjidong atema masü saka teinyaktsü tim mapa ka ama agizüka inyaker, ta Geoffery Yadenisa ashi.
“Tanü küm 25 ajungba ya tatembang ka masü saka ano tajungba inyaka aotsü merangtsü, onok anisüngzük magitsü,” ta paisa metetdaktsü.
Nagaland Post ya tamasabo tapak tilaka nung temesüng nung tanak agi teploker adok aser küm ishika sülen tapak tuluba aser teimba küma sentsü nung adok.
Iba kasa sentong nungsa NPF President Dr. Shuruzelie-i Nagaland Post nem tenüngsang agüja o tatsüka jembi aser jubilee nüngo sayatsü. “Nagaland nungbo Nagaland Post ya BBC amai lir,” ta paisa ashi.
Iba senden takok ngua agitetba asoshi shilem agirtem ajak dang Nagaland Post Director, Wb.Aochuba Yadeni tepela o metetdaktsü.
Tanü Nagaland Post jubilee sentong nung yimten yimsüsür, lokti lenirtem aser tesem balala nungi tembar-medemer aser kinungertem aika arua dena liasü.