Germany: Parliament-i mitkar tashi amshia IS anema raratsü lemteter

Mitkar tashi amshia Syria nung tentetba Islamic State (IS) kiralongrar telok anema raratsü lemtettsü atema agiba vote agütsüba sentong nung Germany yimsüsürtem den külemi, German Chancellor, Angela Merkel (Tiyongtsü)-ia lar vote agüja shilem agiba noksa nung angur. (Berlin, December 04)

 Berlina, December 04 (Agencies): Germany linüki par mitkar tashi amshia Syria nung tentetba Islamic State (IS) kiralongrar telok anema raratsü telemtetba ka Germany parliament yimsüsürtemi tanü Hokolbar nü agiogo.

IS teloki taoba November ita France yimtiba, Paris nung lendong atalokdaktsüba sülen France-i IS anema külemi lungjemer raratsü ayong aser iba tayongzükbaji agizüka Germany linüki tan telemtetbaji agir lir.

Tanü parliament nung mitkar tashi amshia IS anema raratsü onük den sentakba vote agiba sülen yimsüsür 445 tashi iba onükji agizük aser par linüki itangitsü Tornado jet tayimtsütem, frigate rong ka aser mitkar züngsem 1200 shi Syria-i yoka idakji tentetba IS telok anema raradaktsütsü lemteta liasü.

Paris nung nisung 130 tashi tepseta lendong kanga sashia atalokdaktsüba sülen hopta 3 buba nung Germany-i tanüngba alima tashi abenba linüktem den yarisema Syria nung tentetba IS anema raratsü maparen tenzüker lir.

IS teloki France nung lendong kangasa sashia atalokdaktsüba yong European Union (EU) nung densemba tongti linüktemi par mitkar tashi amshia Syria aser Iraq na nung tentetba IS telok anema raradaktsütsü jaokogo.

Britain-ia Syria nung tentetba IS anema raratsü tan Brehostibar nü lemtetba sülen kasa anogo nung IS teloki tashiyim agi agia aliba totzü tutetdak amakba osang jangjaogo.

Ano, US Tir, Barack Obama-ia par special forces mitkar züngsem 100 shi Syria-i tsüngdong yoka IS telok anema raradaktsütsü lemtetba osang bushiteta lir.

2014 August ita nungi tenzüka alima linük 60 nungi teloktep mitkartemi IS anema raratsü tenzüka lir.

Ano külen, Germany-i par mitkar züngsem 650 tashi Mali yoka idakji tentetba kiralongrartem den tongpang teraradak France mitkartem den yaritepdaktsütsü telemtetba ka tanü agiogo.