2016 nungi tenzüka tetsür US mitkartem nem tongpang raradaktsütsü

Washington, December 04 (Agencies): United States (US)-i otsüsütsüsa tetsür o tebur na bendanga amshibaren agiena sangküm 2016 küm nungi tenzüka tetsür mitkartem nem tongpang raratsü maongka lapoktsütsü lemtetba osang ka US Secretary of Defence, Ash Carter-i tanü Hokolbar nü metetdaktsüogo.

“Sangküm 2016 küm January ita nungi tenzüka, tetsür aser tebur na bendanga amshibaren kecha malitsü. Tetsür mitkartem dang temsüa lira, parnok nem tongpang balala raratsü maongka agütsütsü,” ta Pentagon nung osangbener den ajurutepdang Carter-i metetdaktsü.

“Iraq aser Afghanistan tongpang nung tetsür mitkartemi shilem agitsü tenzüker joko küm 10 dak tema süir,” ta shia, 2016 küm January ita tashi nung tetsür aser tebur mitkar züngsemtem bendanga amshiba maparen agientsü tetuyuba ka Pentagon-i US mitkar nem küm 3 tejaklen agütsüba ama US mitkar lenirtemi tan iba telemtetba ya agir lir.

“Mitkar lenirtemi tetsür aser tebur mitkar züngsem ajunga nem kasa maongka agütsütsü asoshi tan agiba telemtetba pela agizüker,” ta shia, mezüngbuba tetsür US Tir akümtsüsa tang jenjang ngua alila, Hillary Clinton densema, US lenir aikati tan mitkar lenirtemi agiba telemetbaji pela agizükogo.