Chennai agi asetkong kümogo

Akhidang Madras ta jaya aliba yimti, Chennai yimti tzümetsüng agi meketbanger asetkong amai kümogo. Tang amai tzünglu sashia aruba ajanga tzümetsüng agi kechalenia moutettsüsa metsüngba lendong yabo tang taküm alirtemibo meteta kodanga matalok ta jembir. Tzümetsüng lendong yabo tajurur aser tangurtemi jembitsüba dang lir, kechiyong ibai tetsübutsüka lir. Alima ya lendong agi sünga lir saka lendong rongnung lendong tulutibaji tzümetsüng ya lir. Aji oda, nisungtem alidak ki ajunga metsüngbanger longki tulu aser talang nung alirtem temaba takdang bushia tua jenoka lir aser karbo kilem nung jenoka lir. Nisung aika pei akaba ajak tzümetsüng agi raksatsür anarongdena taküm dang kümzüka lir. Atangji, tang ama lendong nung sorkar aija jembitsüba mapang masü kechiyong iba jagi teyari kecha mangutsü, anungji akok tashi tzümetsüng agj atsüngbanger kechalenia mouteti alirtemji kümzüka yaritsü asoshi ajaki bilema inyaktsüla. Tang tashi nung Tamil nadu Chief minister, J Jayalalithaai anir state sokari kanga karaa teyari agüja anepaludagi aser center nungia ato kilonser Narendra Modi-ia tzümetsüng agi atsüngbanga aliba tesem ajak repranga senzüba sülen teyari sen crore meyirijang ka tashi agütsüogo. Tang tashi nung iba tzümetsüng lendong nung nisung 200 shi süogo aser Chennai tayimtsü anendak aienlen jajar nisung 1500 shi den tangar nisung meyirijang ana shi kechalenia mouteti mongdagi. Parnokji ano anogo ana semkabo yangji amongtsüsa akümtsü, kechiyong idak nung jagi gari moutettsü aser December 6 tashi tayimtsü mesenzütsü ozüng agüja lir. Iba ama alima lendong ajanga bener arutsüba tesama aser takoksaji onsara tulu lir. Atangji, tzümetsüng ya süitemtsü aser Tamil Nadu yanglushitsü asoshi anogo tasen ka arutsü. Ajisüaka, asenok ajak atema tongtibang kaji, Chennai ama kodanga tzümetsüng agi matsüngbangtsü ama wangshiwangshia aliba yimti ka tzümetsüng tsüngdang apudaktsüsa akümba tensa tiaji asütsü. Atangji, tang taküm alirtemibo kodanga mangu aser mangashi dangba lendong ka atalokbaji kanga meimlaba lendong ka lir, anungji yimti nung alirtem aija jembitsü lenmanga sadema mali. Ajisüaka, asenok ajaki hau ta agizüktsüba mapa kaji koba yimti aser tesem nung lidir liaka, talirtemi alima lendongtsüdongtem nungi kümzüka alitsüsa inyaktsübaji lenmang aisü nung nüngdak adoker. Aji oda, yimti nung alirtemi peisasa pei lendongi maitsüsa inyaktsüba mapa tongtibang kaji tzünglu arudang motzü aoba kilentzü aser ayong onbanger kiojen meyanglutsüla. Shiba südir süang pei ki tonga Fire brigade garibosa tonga arutettsüsa lenmang sadema yutsütsüla. Tang tashi asenok tashitemetter amato liaka, asenoki asenoksasa alima lendong nungi jenbua alitsü memeteti aliba purtem aika lir. Asenok aikati asen kima gari lenmang sadema melapoktsür. Iba jagi pi dang masü asenoka, talisa, lokti senden alidang timatemer. Iba jagi aiben tesem balala nung kitsük-kirong lendong atalokdang yaktayongi mi tepsettsü melen, lenmang maliba ajanga fire brigade gari moutet aser meitet, tapayutsüka, ki aika rongdoker. Aji oda, tang Dimapur nung Nagarjan len ki rongdokba tesem tonga gari moutet takoksa ajuruba ajanga tesama takoksa ajuruba nungi asenok tangazüktsü aika lir. Iba amaji tang Chennai yimti asetkong küma tzü agi atsübanger alibaji, ashiko meilongi- meilongi taoba küm noklang ka shi nung yimti nung alirtemi kilentzü junga meyutetba aser kilentzü yima lua aliba onpanger ki asüba agi motzü paika ya taodak maka timtem agütsür asütsü ta bilemer. Tanü asenoki ali tilaka aginüdang, tarutsü nung lendong ataloktsüba indang kecha mebilemdangi morumorua inyaker, saka iba jagi tesensakba dang kümdaktsür aser tesüsa asensasa asen lendongi aier. Asenokbo, joko asen kija atema bilema inyaktsüba masü saka tarutsü anogotem nung asenoksasa asenok aser asen chirnurtem lendongi maitsüsa bilema inyaktsübaji kanga tongtibang asütsü.