Sorkar school temi nija school tem memeneper : Tohanba

Kohima, December 5 (TYO) : Sorkar school tesayurtem nem itasen tajung agüja aser sen aika endokaka sorkar school tem jenjang kanga majung, ta Honibarnü Municipal Affairs, Economics & Statistics Parliamentary Secretary, R. Tohanba-i ashi.
“Sorkar school tem dang nungi nija school tem tajungba. Sorkari tesayurtem dak sen aika endokaka sorkar school temi nija school tem memeneper” ta pai ashi.
Honibarnü Mezhür Higher Secondary School Kohima nung Parents Day’ sentong nung o jembidang pai iba olen ashi.
Iba ya ajanga sorkar school tesayur aikati nendaka meinyakba jungkai adoka sayur aser ibaji metongshitsüla, ta Tohanba-isa metetdaktsü.
Parliamentary Secretary-i nija school tem nung tesayurtemi kaketshirtem kanga junga anitetba atema tenüngsang agütsü aser paisa tsüraburtem dang pei chirnur nem mapang peria agütsütsü aser parnok len anitsü ayongzük.
Tohanba-isa MHSS nung ketdangsertem aser tesayurtem nem tenüngsang agütsü aser pai ashiba agi, Nagaland state nung school tajungtibatem rongnung iba school ya ka lir.
Iba sentong nung Central Baptist Church Bayavü Pastor, Neisakuolie Kesiyie-i temoatsü meshia sarasadem, Wongsu Tütsüliu-i tesentepertem pela agizük, MHSS Head Master, Robin Thapa-i annual report metetdaktsü aser Managing Director, P. Atuo Mezhür-i anküp tepela o jembi.