Atangji “Matamabensabaji Tsüngrem mapa jungkai adoktsü asoshi.

~ S.Aosüngküm Ozüküm, Dimapur

Kodang alima nung Tsüngrem mapa jungkai adokbatemji aroka shisadangdir, jelia osang magütsüi mesüra Pai shimtetba aser jatetba nisung ka den danga mangdang aser pungmang nung mejembibo ataloka mali. Yamaji taoba putu nung ainkartem aser chubatem ano putirtem den jembi, saka Yisu mapangbo telok rongnung noktaker jembi aser jakdaka aneptsü, khen khenbo Pa tsüngdong moaka Pai o ka ashiba ajanga anepadok, ano mapang ka kabo pei sasa tzütu nung oa shitoktsü ozüng agütsü aser idangji tashi angaba ajanga anep, ano kar dangbo ne tamang agi na anepogo ta nütsüngtemi ajia lia o agi aneptsüba tasen laitem rongnung “Osang tajung kaket ta ajaba kaket pezü prongla nung tezülur balalai lirben jungnüa tesem balala nung yimya balala agi aneptsüba zülua angutsü. Iba jagi asen Kibuba Yisu dak taneptsütsü ain tashi tulu liasü ta meteter. Item rongnung kuli kaji Yohan kaket tapu 9:1- nungi kodang züngyonga odir, Yisu aser nütsüngtemi tasodangyongi tenük poker asoba nisung ka ajurua parnok tsüngda tasüngdangtepba aika asüngdangtepa aodang, Yisui ashiba o kaji, ” Iba nisungi mesüra pa tsüraburi temenen mebenshi, saka pa dak Tsüngrem mapa jungkai adoktsü asoshi ta züngzünga ashiba kasa oji tanüa asenoki süokiia bilemdangra, “atangji tsüngtsüker, nükpoker, narongjaker aser tia balala agi meneper alirtemji Tsüngremi Pa mission nung tongtibang nüngdak tulutiba ka asoshi yanglu ta asenoki angateter.
Sürabangla tanü tamanger teloktemi koda angateta inyaker (?) ta bilemdangdi. Kodang Mark kaket tapu 10:46 nungi züngdangdir matamabensar nükpoker ka süaka taneptsü ngunür sürnung lenmang mengui alidang anasa alirtemi yaritsü melena ola tadok ta songtema ayuba amaji, tanüa Yisu sülen anitakertemi koda jembir aser benshir? Temeimbatem asenok jakdang shitak mesükba lenmangtem aika lir, saka tatem nungbo iba jagi tajangzük kecha magütsütetba dang masü, saka tasübaleni anir ta laishibai ashir. Yamaji tanü tamanger lokti nung inyakyimji shitak inyaker ama angur, saka tamanger teloki inyaktsüba mapatem aika senzüka toktsür alima tsüngdang khonang angutsü aser tenüngsang ajangzüktsü asoshi tenük agi angutsüba mapa tajungtem inyaka sayudang, pa/la dak mapetba aben süoshi sobuba agi tajitsü tobur mejungi kümdaktsüba ama, tamanger lokdi jia tereprangtsü tobur kanga mejungi angur. Asenok ajaki khen jungjunga shisadangdi, tamanger lokdi nung “Matamabensar asoshi küm nungi küm kecha nunga mezüngoktsü noh? Oda senzüka toktsüdi ma? Parnok den Tsüngrem mapa inyaktsü, timtem, tuoshi , mokokmin ajiteta yaritsü tanela chiyongtsü agütsütsü, tekümtet lenmang sayutsü alima nung tenteta akaba (NGO’s) nem Tsüngremi nungloktsü asü tamanger telok nem nungloktsü (?) ta shisadanger.
Temeimbatem yangi arogo aser yangji aliba tamangertem shilem kecha mali noh? tenüng atema Calendar nungbo tobur onsara junga züluoka ayu, saka iba melena pei mulungba sentong dang agiyonga aoba angur, sürabangla iba jagi asen loktiji Khrista sülen anidakba aser Pai sayuba tsüngsü nung jajar ta kuli abensar asü mabensar. Temeim tamanger tajungtem, küm nung anogo ka shimteter sentong ka agia amungtsübajia kanga tasak noh ? Oda tangar memeneperji Khrista osang tajung mangashiyonga kecha masü ta bilemer asü koda mesüra tekümteta angutsü menüngdak ta bilemer asü? Yisu aser nütsüngtem külemi jajaba mapang nükpoker ka ajuruba otsü to ano khen lepa arua jembidi sürabangla, “Ya shiba menen yong, ya tsüraburi asü pai temenen benshiba agi ta asüngdangba rongnung asenoka adener küma aser atakatem ka ama sükshia tamanger lokdii teka ia meinyaker mesüra meyarinür asü koda? Asenoki kodang asadangdir ABAM-i sentong tajung atonga 2012 küm nungi December ita nung deobar anogo ka shimteta ” Differently Abled Person Day,” ta sangdonger aruaka, arogo aika nung tashi angaa inyakba mangur, oda anogo tarensen tobur ajungtsü atema züluoka ayuba dak alaka “Hau, ibai asen lushi, ya asen teinyaktsü wadang aser ya Yisui mulungba mapa ta süokiia bilema inyaker kata mali noh?. Saka tanü alima nem ngudaktsütsü atemabo mapa jenti inyaka aoba angudang, atangji iba yagi Tsüngrem peladima ta bilemdanger. Oda tamanger lokdi kar nung temulung agüja inyakaka, ano karbo koda masü inyakbajia tangar telok nem ang kuli nongloktsüba angur.
Tamanger lokdi nung matamabensartem anepalutsübaji ” Pi nu khen pongtsür amai bilema, temulungjang taroktiba agi masü kuli küptoktsü atema dang inyakra, atangji “Yisui asenok nem nongloktsüba mapa nungi asen teka atsüngener masü noh? Asenoki anepdang nungi aonung tashi nung Yisu tenüngbo aiben tetshir, saka pai sayuba mapatembo Pa tsüngsü ania meinyakra ajak amajok. Kechiaser asen Kibuba Yisui jembiba o, aser mapatem laishiba nung zülua aliba yabo tamanger lokdi nung benshia aotsüba aser kati ka yaria ajak den kasasa meimtepa alitsü tesayuba agütsüba ta angateter. Tat ka: NGO’s- temi küm shia “World Disabled Day, 3rd December anogo nung amunger. Saka tamanger teloki item nüpurtem senzüka toktsüra, telok ana rongnung shiba ket nung laishiba aka(?) ta asüngdangtsüsa akümer. Kechiaser tamanger teloki kuli süa inyaktsüba mapa ka alima nung telok tentettem jagi dang inyakra tamanger telokji Tsüngrem tsüngdang sentsühtsür asütsü ta shinür.Temeim adianutem, Isaia 35:1-6 nung zülua aliba ama asenok tamanger lokdi mapatem aser asen tamang jenjang Tsüngrem tsüngdang tagizüktettsü südaktsünüra alima nung tashi mait temokok tashi itta noktakdaktsüdi, tataseta alir dang tetsübu tashi itang ta shidi arungma.
Ano tangar teyari nüngdakertem aser teküpbok tia nung alirtem anitetba aser jenjang ajungketba nung khrista züi alangzükba purtemi anir shilem tajung agira asen tamang mapa abensaba den külemi asen lima azükarua alitsü. Saka tang amaisa alima tenüki agutsüba mapa tajung inyakba nung temulung agütsür jajadang asen Kibuba Yisui sayuba mapatem meinyaki senzüka toktsüra, asenok amajok nung belemer dangashi Tsüngremi asen mapa tendangdang temeten mengutetra koda ta bilemba agi tanü “ABAM-i shimtetba anogo den yarisema iba o ajanga tamanger telok den shisa lemsateper. Atangji “Matamabensabaji Tsüngrem mapa jungkai adoktsü asoshi”, ta laishibai ashir. Iba Olemsabangi arua shisa lemsateptsüsa Tir Yimyimi maongka tulu agütsü nung kanga pelaba metetdaktsür.
Oda kü tebilemba lemsatepdang mabensai/ mejungmazüi zülusema lira kü dang tai tokangma. AMEN.