ULFA lenir Chetia nem bail magütsü

Guwahati, December 05 (Agencies): ULFA lenir Golap Baruah, shiba dang Anup Chetia ta ajar pai bail temepishiba benokba Honibar nü magizük aser tanü CBI ken o pa den tembanga ano anogo 14 judicial ket nung ayutsü tuyuogo.
CBI ken o tanü tembangba sülen Chetia Special Judicial Magistrate, CBI, Assam matsüngdangi anir oa liasü aser ano anogo 14 judicial ket nung ayutsü tuyuogo.
Iba sülen pai bail temepishiba benokba angadangtsü atema pa Chief Judicial Magistrate (CJM) court-i anir ao ajisüaka court-i temepishibaji magizük, ta Chetia atema okatsür, Bijon Mahajan-i ashi.
Maneni iba sülen Special Operation Unit (SOU) ken o dak sentakba nung police-i anogo tenetnü atema pa meshia liasü, ajisüaka iba ken o nung pa anema ken o benokogo ta shia temepishibaji magizük.
Pa ano December 19, 2015 nü okadaki anir aotsü.
1997 küm Bangladesh police-i Chetia apuba mapang nungi tenzüka pa kidanger linük tepouktak liasü aser taküm November 11 nü Bangladesh sorkari India nem agütsüba sülen Delhi nung CBI-i pa apu.
Chetia ya Golaghat (Assam) nung nisung tepsetba ken o nung CBI-i apu aser parnok ket nung trok nü transit remand nung liasü.
Maneni pa November 18 nü Guwahati-i anir arua kasa anogo nung SJM CBI Court mastüngdangi anir aoba sülen CBI ket nung anogo 5 nü agütsü.
CBI ket nung anogo 5 ayuba sülen November 23 nü pa okadak anir ao aser anogo 14 judicial ket nung yur tanu ano maneni judicial ket nung anogo 14 ayutsü tuyuogo.
ULFA lenir Chetia ya maneni Guwahati Central Jail nung ayutsü.