TR Zeliang & Y Patton nati kaketshir 2 khasetba aitsür

Dimapur, July 17 (TYO) : Brihostibarnü Phek district kübok Phor yimtsüng nung NSCN (K) aser sepaitem tsüngda khatepdang kaketshir ana khasetba atema mulung züreper aser takoksa ajurur kibongtem den asüku lemsateper, ta Nagaland Chief Minister, TR Zeliang-i sangdong ka ajanga metetdaktsü.
Iba lendong ya matalokdaktsütsü koka liasü aser ibaji atema jashir. Nisung ajaki public aliba tesemtem nung injang mamshitsü ayongzüker, ta chief minister-isa sangdong nung shia lir.
Chief Minister tetuyuba ama, DGP Nagaland den Commissioner, Nagaland aser Home Commissioner nungertem lendong atalokba tesem tonga ogo aser parnoki osang tejangja metepelatsü, ta sangdong nungsa shia lir.
Iba lendong nung tasürtem aser yirua alir nem Phek Deputy Commissioner ajanga senotsü teyari agütsüogo, ta chief minister-isa metetdaktsü.
Ano, Nagaland Home Minister, Y. Patton-ia sangdong ka ajanga Assam Rifles sepaitemi kaketshir ana khasetba den tantsür ka yirutsüba osang angashia temulung züreper ta metetdaktsüogo.
Iba lendong nung asürtemji Sukaho’er jabaso Tiizali (14) aser T Yiteli’er jala Aso (13) na liasü aser yirua alila Riitu kinüngtsü Vitsiirho (24) lir, ta Home Minister-i sangdong ajanga metetdaktsü.
Iba tatalokba ajanga Wuzu yimtsüng aser temeket nung tensa mejungi kümogo. Nagaland sorkari India sorkar aser NSCN (K) dang maneni ceasefire alitsü mepishia arur kechiyong Nagaland nung yimjung alitsü atema inyakba maparen nung parnoki shilem agiba ajanga dang teti atema telemtetba tajung ka agitettsü, ta Y Patton-isa ashi.
Nagaland sorkarisa India sorkar dang Disturbed Area Act (DAA) agientsü atema mepishir kechiyong iba ya ajanga India sorkar aser Naga yimten lennirtem tsüngda yimten ken o jembitsü atema tensa yanglua aliba mejungi akümtsü, ta paisa shisem.
Y Patton-isa ashiba agi, Nagaland sorkar, mulungtet teloktem aser nüngdakba nisungtemi yimjung maparen tanaben shia arudakja inyaktsü atema merangba mapang ibala tensa ajuruba ajanga tetsükdaktsü ang bener arutsütsü. Anungji, sepaitemi pei mapa inyakdang Nagaland sorkar, nübortem aser tanga teloktem yimjung aginür ta angateta mapa azüoka inyaksangshitsü mepishir.
Ano, NSCN (K)-ia nübortemi ola adokba angashia India sorkar den ceasefire maneni alitsü ni mepir, kechiyong ceasefire ali nungdang Naga yimten ken o atema inyakba maparen takok angutsü, ta Y Patton-isa metetdaktsüogo.