Walunir Lt. General (Retd) Merentoba Ozüküm den 2015 Feb 9th nü phone nung sensaksemba

~ Tiala Imchen, Dimapur.

February 9 nü aonung pungu ako nung watsü Pangila M/Chuket, teyari ajanga mobile phone nung general Merentoba den jembitsü maongka angu.
Tiala – Oba! Na asen Aor rongnung dang masü Naga nuger rongnung sojasor ka ta bilemba agi taonung ya ni nü den jemberbaogo. Ni Tiala Imchen, Mangmetongtsür Dimapur nung alir aser kaket zülur ka lir. Tang ni asen Aor grouping mapang rishikangshi timtem otsü züludar. Iba kaket züluba ajanga ni na meteta aküm.
Meren – Obala küm joko 91 tain, tenaronga anü anür. Ana mobile phone mopung manung jembir asü nung khen angashili, ano mopungi olaji bener oadokli asürji tongmelang agi dang ni o kar shidi. Ni 1951 küm NNC nung join asüdang Brigadier nung aiba, medemertemi kü nem Promotion 1956 February 22 nü agütsü. Cease fire aruba agi onok anenba dang, anungji India-i Naga makok, Nagai-a India makok, kasa dang asü. Tang tashi shiangaia shianga makok lir. Onoki tenzüka yutsüba nungji nenok lanu putui bener oang.
Tiala – Oba, ano ni nü dang langka asüngdangdi, Major Suren Singh kasetba anogo kaket ana nung balala angur, koba shitak metetnür.
Meren – Ajibo ni file nung ajir dang shidi no. Tenü! Obalai na kodanga mengudang, saka taonung nü den jembidang na shibar kanga junga metetogo. Asen Ao kin-i linük asoshi takoksa jenti ajurua aruba otsü samatsüba lia, tanü Tsüngremi na Ao kin asoshi mezüja shimtetba asoshi Tsüngrem tenüng asanger.
Nai Aor tebur ajak ajateta inyakogo. Onok senzüba meta tesem ajak nung nai kolem, Paper, Camera, amer na tetsür chanu kati, nüken nüktzü jenti arema, sen jenti indoka iba mapa inyakdang, ammangi sangwa küma jajabaji obalai kü nükla nung na angur. Nai tang züluya alibaji kaket kümer azüngdang Ao kin-i nü mapa tajung tamadokni ta obala mulungjang taroktiba nungi ayimtener.
Tanü na, tasü tait, temulung tulu, Aor jala ya, obala nunger mapang 1950’s nungji liasü asübo koda jungla ta, tang nü den jembidang bilemer.
Tiala- Aya! Yah…yah…oba. Ni iba mapang nungji nenok den liasü asübo Indian Army-i kasetadoker lila. Aser tang grouping otsü züluya aliba ya, mezülui lila ni.
Meren – Wa..Shitakani (Pa menü). Tiala! Joko obala nunger süadokyonga nüjisoji ngur amai pelaseta dang asütsü. Kechiba süra nai obala nungeri linük asoshi taküm agütsüba kaket ajanga alima dang sangdongtsüji, Indian Army-i shiruru ama azükba aser tenem, longren, atang ajak nung tepok tazüng senzüba timten ajak to taonung amadokogo.
Tiala – Yamaji küna minute 20 shi jembir, ni pa dang nenok linük tenzükdang Indian Army-i tesüngmangtsüka rishikangshiba zübu agi ner medemer aika anojungi alima nungi pilaogo. Saka Tsüngrem taochi agi nabo tang tashi tekolok shisatsü, shitak dang lia ana mobile nung dang asüyonga jembitetba atema ni tenüngsang agütsüdi, ta ser phone nung ni sarasademer kena jembiba anen.
Pai jembiba o-ji kanga dang shisadangtsü o lir. ‘Indiai Naga makok’, “Nagaia India makok” tang tashi kasa dang, ta ashiba o jagi kü mulung nung kanga atsüng. Item ajak jagi sayur pa atamata nisung masü, sojasor ka ta sayur.
Ni ano obala Merentoba ya asangsang nungbo majurui lia 27th November nikongdang 3:00 p.m. meta Mrs.Pangilai phone nung Tiala! Merentoba tanep süogo aser tang Funeral temer tasümang leperi bener odar ta phone nung ashidang, kanga aoksa aser ni pa majurudang asüba atema kanga nemjema sasar.
Tatem nung par kinunger ajak den ni iba sensaksem ajanga asüku lemsateper aser kü sarasadem nenok den lir ta metetdaktsür. (Shirnoki Merentoba tasütait mapa tali metetnür, “Ao lima nüktzü” kaket Page No- 221-224 nung angutsü).