Madhesi lenirtem ken o lemteptsü New Delhi-i apusogo

Kathmandu, December 06 (Agencies): Nepal indang temzüng tasenba anemer, Madhesi telok nung lenirtem, tang mangatettep adoka aliba ken o jembitsü asoshi India Ato Kilonser Narendra Modi aser yimsüsür tekaketpur den ajuruteptsü Deobarnü New Delhi-i apusogo.
Deobarnü New Delhi-i apusor, Joint Madhesi Morcha nung lenir taintemji Terai Madhes Democratic Party Tir Mahantha Thakur, Madhesi Peoples Rights Forum-Nepal Tir Upendra Yadav, Sadbhawana Party Tir Rajendra Mahato aser Terai Madhes Sadbhawana Party Tir Mahendra Yadav nunger lir.
Linük nung tang magatettep adoka aliba ken o tajungba küma lemtettsü mechi Madhesi telok nung lenirtemi tang Nepal nung opposition party, Congress, tang yimsütesüdak CPN-UML aser Unified CPN-Maoist teloktem den kangasa nüngdaka aliba senden ka Honibarnü mena liasü. Iba senden nung parnoki takhangba 11 yimsüsürtem nem agütsüdang sorkari tang linüki nüngdakba oset kecha bener maruteti aliba tensa azüoktsü asoshi parnok nem ‘agenda’ asem agüja liasü.
Joint Madhesi Morcha lenirtemi Modi, External Affairs Minister Sushma Swaraj aser lenir taintem ajurua Nepal anüolentip tsütsü tang tatalokdak mangatettep nung nüngdakba olemtep kar agia iba tebilemtsü koma ser koktettsü iba indang jembishinütsü.
Sorkari agütsüba onüktem nungji linük nung aliba party ajak nungi committee ka tenteter par litsü telungtet nung arrtsü atema mangatettep aliba bentettsü aser Nepal o India na arrtsülen Madhesi teloki lungkak aitba anentsüla ta shia lir.
Madhesi teloki linük temzüng anema tang agi ita asem buba lungkak aiter. Parnoki akhangba rongnung tongtibangtemji linük telungtet nung province arrtsü latetshitsü, yimten nung shilem shidak lemzüktsütsü aser Tatar Hoho nung netsüngyongsük apir menden atatsütsü onük tem lir.
Deputy Prime Minister & Minister for Foreign Affairs Kamal Thapa-i, transport aser supply management tebilemtsütem tepongbaba akümtsü kechiba süra India jilia mesangdongi mokdangba memunui lapoktsütsü, ta metetdaktsü.