BJP-i sorkar kümnüra Ayodhya nung Babri Masjid yanglutsüla: Azam

Lucknow, December 06 (Agencies): Deobar nü senior Samajwadi Party lenir aser Uttar Pradesh Cabinet minister, Azam Khan-i, BJP-i ano maneni sorkar kümnüra party-i Ayodhya nung Babri Mosque (Muslim tekülem ki) yanglutsüla, ta ashi.
Samajwadi Party lenirisa, RSS ya nokdangtsüla, ta ashi.
Babri Masjid raksar küm 23 ajungba mapang ka nung Azam Khan-i item o ya jembiogo.
Tawa Azam Khan-i, Rashtriya Swayamsevak Sangh (RSS) züngsemtem ya tebur o tebur na shi nung medemba züngsemtem lir ta jembiba ajanga tashishitep ken o adoka liasü.
Taoba Hokolbar nü Vishwa Hindu Parishad (VHP) lenir kati, Ayodhya nung Ram tekülem ki yanglutsü atema anogo lateta ayutsü, aser iba mapang nungjibosa tekülem ki yangluzüktsü merangtsü, ta jembia liasü.
VHP lenirisa, sangküm January ita tashi nung sorkari telangzüba ka magütsütetra VHP-i asentenshir tekülem ki yanglutsü atema akhangtsü, ta ashi.
2010 küm Allahabad High Court-i iba ali shilem asem nungi shilem ana Hindu telok aser shilem ka Sunni Waqf Board nem agütsütsüla ta obendang agütsübaji VHP-i magizüker, ta VHP-i shiogo.
2010 küm Allahabad HC-i iba mangatettep liji shilem asem lemdangtsü obendang agüja liasü aser iba dak sentakba nung VHP leniri “Kodaser court kati mosque (Muslim nunger tekülem ki) atema ali agütsür (?) Ayodhya nung mosque ka yanglunüra parnoki Sarayu ayong tip külenji yanglutsüla. Iba ali ya Lord Ram asoba tesem aser iba li nung mosque yanglutsüji onoki magizüktettsü,” ta VHP lenirisa shisem.