Nagaland nunga tanü Armed Forces Flag Day amunger

Dimapur, December 6 (TYO): Linük den külemi Nagaland nunga December 7, 2015 nü Armed Forces Flag Day amungtsü aser iba anogo nung ni Army, Navy, Air Force & Ex-servicemen, kinungtsütem aser parnok kibongtem dangi tepela salem abener, ta Chief Minister, TR Zeliang-i sangdong ka nung metetdaktsü.
Armed Forces personnel-i linük kümzüka ayutsü atema parnok taküm bendanga agütsüba atema pelaba aser ano tang teinyakdak Armed Forces personnel den asenok külemi lir, ta sayutsü atema Armed Forces Flag Day amunger, ta TR Zeliang-isa sangdong nung shia lir.
Iba anogomung nung sensosanger nem token flags aser car flags alemtsü aser item asoshji temulungertem tenla bendentsü. State sorkari department aser office ajak nem token flags & car flags lema agütsüogo aser tenla aruba jagi sepai kinungtsütem, lemtar aliba sepaitem, Ex-servicemen aser parnok kibongtem yaritsü. Anungji nisung ajaki iba mapa tajung atema mulungsoa tenlatsü ayongzüker, ta Nagaland chief minister-i sangdong ajanga mepishia metetdaktsüogo.