France ketdangser Damien Syed-i Hornbill benjung nung o jembi

Dimapur, December 6 (TYO): Hornbill Festival tenzüker anogo trokbuba nung Nagaland Chief Minister, T.R. Zeliang-i tongti tesemdanger ama shilem agi aser iba sentong nung Consulate General of France Kolkata, Damien Syed-i o jembi.
Tanü TR Zeliang-i o jembidang, Nagaland asoshi telemtetba tajung ka agitettsü aser yimjung bener arutsü atema tongtibangtibaji telongjem lir, ta ashi.
“Hornbill Festival nung Nagaland kübok kin 16 indang sobaliba aser yimyatsüya sayuba ajanga Naga nunger longjema lir ta tangar dang sayur aser iba ya ajanga alima dang Naga nunger maitsü sayur,” ta paisa ashi.
“Yartsüngsanger teloktemi alima dang Naga nunger sobaliba khenyongi balaka ta sayuba atema tenüngsang agütsür. Sensosangertemia Nagaland Tourism website nung pei tebilemba lemsateptsü akok,” ta TR Zeliang-isa metetdaktsü.
Tanü sentong nung o jembitsü atema tetushi tejaokerji Consulate General of France Kolkata, Damien Syed liasü aser pai pa Nagaland nung iba benjung nung adentsü atema jaokba atema pelaba metetdaktsü.
Nagaland sorkari pa jaokba atema pelaba nenshia metetdaktsüba den France-i Nagaland nung urban development, hydro energy aser agriculture tsütsü tesentaktep lia inyakteptsü, ta Damien Syed-isa metetdaktsüogo.
Sentong tembanga o jembidang School Education & SCERT Minister, Yitachu-i iba benjung nung kin 16 külemi shilem agiba ajanga Naga nunger telongjem aser tashi sayur, ta ashi.
Iba benjung ya Naga nunger sobaliba sayutsü atema sabang ka dang masü saka bendangertem dang asen takar sobaliba indang shisatsü agütsütsü atema lir, ta Yitachu-isa shisem.