Benjong sübotsü agi mazü !

Joko taküm küma Khristmas benjong mapang atonger asünungji Nagaland nung tongtibang town-tem Dimapur, Kohima aser Mokokchung nungbo kima yimdong ajaklen benjong sübotsü (decoration) enokogo. Item benjong sübotsütemji aonung balaka lilang nungibo temenungratsüka angur. Ajisüaka, kodang tonga odir benjong sübotsüji auyi agi pongbanger nisung dak tzü mechigo tejaka memeyi ser süoshi tasen semoktsüba angur.Ibaji taaktsüka aser tezüdangtsüka lir. Ibaji shinga taia masü asenok tai agi asenok nümamedangtettsüsa alir. Iba ama tia indang bilemdangdangbo asenok pei kidang benjong sübotsüang meinok, iba sen jagi lenmang nung auyi mapongtsüsa yangluang tajungba süla ta bilemer. Tangbo benjong sübotsü indangang jembir saka ano benjong süoshi nungang sen teimba endoka jajatsü aser ano auyi ajak ponga süoshi tasenji semer senzütsü. Ibajisa taaktsü taketba asütsü. Ano, benjong asünungji takar aser tulurtembo gari lakh aika jenjang nung süoshi tajung den necktie mesür senzü dang auyi agi gariji pongbangtsü aser lenmang tapok nung gari atashiba agi tipdema mementettsü. Item takar aser tulurtemi amshiba garitemji karbo sen crore jenjanga lir. Iba sen jagibo Naga nunger yimtsüng ka küm anasemka shibo chiyongshitsü. Item gari aser iba telonglen aina shibanger mena alirtem o parnok senzüba lenmang naji am züdoka itta lir. Item nisungtem jagi tenük aina tanak tululu agir, anungji parnoki lenmang majungba aser lenmang nung auyi apongbaji junga menguiang alitsü südi. Item tenük aina tanak jagi lenmang majungba dang masü saka nübortem sensakba aser lanurtem timtemba tia mangur. Iba ama timtemji ali nung tetsüng agi jajartemiang dang metet  asünungji, parnok aikati timtem marem dang masü saka tangar dang taak marem agi aiben peisasa mulungtet tenla sarua lenmang inyaker. Nübortem karibo kima yimdong dang masü saka among atener yimkong jajaba lenmang tashi temulunger tenla sarurepa inyakba nguogo. Iba ama tangatetba tajung agi, sorkari anepalutsüba lenmang süaka, pei sen endoka yangluba ajanga tanübo lenmang karbo junga lir. Ajisüaka, item lenmang yanglutsü pur yimsüsür aser ketdangsertemibo pei sen endoka sorkari anepalutsüba lenmang ka yanglubaji menüja dang reprangdar südi. Asenoki asenok sen bentepa asenok jajatsüba lenmang ka yanglushi, kechiyong sorkari yanglutsüba ser nung meyanglu, ajisüaka, ashiko, iba lenmang tenüng nungji nisung karbo sen agizüka agir iba sen jagi ki tajung ka yanglua alitsüa akok mesüra aliang tuluka alia alitsüa akok mesüra pei chirnur kaketreju tajung nung yoka alitsüa akok. Lenmag meyangluaka, lenmang aliba ajanga iba tenüng nung nisung karbo yamaji jangratema tajangzük agir saka nübortembo pei timatemba dang masü saka tangar bendangertem danga aaker. Iba ama shitak meshitak mebendangi inyakba mapatem toktsütsüla aser kechi shitak aser ochi aji inyaktsü merangtsüla. Asen lima nung ya gari lenmang dang ajung nung ajak tajung asütsü, kechiyong tangar dang nümadanga sayutsüsa asenoki yangluba nüngo mapa aser tesem kecha maka-aka, Tsüngremi yangluba Naga lima ya topur tajung, tzü mopong tajung aser nübortem jaklaji sasapela, tagütsünü, tejungnü aser teyari. Iba jagi bendangertem aika puar aser Naga lima nung pei lima nung alir ama sadoksadoa monger aoer. Aji oda, Naga lima yimti yimdong nung auyi mapongtsüla, gari lenmang ajak tesadem aser tajung asütsüla. Tanübo asenok timmatemer , ibai Naga lima asoshi yimji yimjung mapang ka lir, iba mapang nung ya, talisa, lanurtemi Naga lima topur junga yanglushitsü asoshi yimten aser lokti nung ochishia shilem agitsüla. Kodangangka, Nagaland nung yimti yimdong temerük, kilem aser jara nung auyi meponglok ser benjong sübotsü sübotsütsü ? Kodangangka Naga lima merükba agi hopta junga süoshi agir kima yimdong nung senzüyonga memenentsü ? Kodangangka, Nagaland yimtitem nung Khristmas benjong sübotsü petpeta sübor nübortem pei lima aser pei yimti agi nümadanga senzütsü ? Iba anogoji yangyar. Iba anogoji shibai yanglutsü, lanurtem ?