Assam Speaker-i BJP MLA 6, Cong MLA 9 anentsü

Guwahati, December 07 (Agencies): Assam state assembly senden nung rongrong adokdaktsüba aser tashi mangaba ajanga Hombarnü Speaker, Pranab Gogoi-i tawa opposition party pusemer Congress MLA 9 aser BJP MLA trok tan senden nung anogo pongu atema anentsüogo.
State assembly mezüngnü Question Hour tenzüktsü lia Speaker-i, BJP nungi züngsem ajak aser Congress nungi opposition pusemertem ajak tan senden tepiyong atema anentsür, ta ashi.
BJP nung MLA trok lir aser tawa Congress MLA 9-i BJP den tesentaktep ayutsü lemteta liasü. Parnok ajak senden nungi anentsüogo. Assembly nung tang züngsem 126 lir.
Tanep senden tenzükdang BJP MLA, Jadav Chandra Deka-i Question Hour agientsü aser state nung temzüng ozüng tensa raksaba onük nung o lemteptsü takhangba agüja liasü.
“(State nung) Temzüng ozüng tensa anogo shia tamajungba akümer. Hindi oshi jembirtem reshikangshir aser Jehadist maparen tali züiner. Tanüsa iba onük jembitsü onok nem temelaba agüjang,” ta Deka-i ashi.
Pai akhangbaji Speaker-i magizükba ajanga BJP MLA ajak noktaker ola adoka kasa takhangba agütsü.
Iba mapang nung minister tem densema Congress MLA temi opposition anema ola adok.
Iba sülen BJP MLA tem ajakji senden sabangleni oa maneni kasa takhangba agütsü.
Congress nungibo sodi magi saka opposition den tesentaktep ayur Congress MLA 9 jagi opposition party pusema liasü.