NCF Chennai Pastor-i metetdaktsür

Dimapur, December 08 (TYO): Chennai nung tawa tzünglu kanga sashia aruba ajanga takoksa aika ajuruogo ajisüaka tangbo electricity, mobile, Internet, ATM, tayimtsü o train aser bus jajaba ajak akhi ama kümogo, ta NCF Chennai Pastor, Wapangtoshi-i sangdong ka nung metetdaktsü.
Yimti tesem balala nung kaketrejutem aika tzümetsüng ajanga shibangba agi Chennai nung Naga nunger kaketshirtem aika yimti toktsür oa liasü ajisüaka Chennai nung aliba Naga nunger adianu mesüra adianutsür shinga yiruyipong ajuruba mali, ta paisa ashi.
Aji oda süaka iba lendong ajuruba sülen Nagaland nungi Chennai nung arua alir kar danga kinunger aser medemertem den tongtepratep mesüteti lira, yimti ketdangsertem teyari agia teyari tekaratiba nung agütsütettsü asoshi mobile no +919840127998 nung tekaratiba nung tontgeprateptsü akok.
Iba lendong dak sentakba nung yimti toktsütsü asoshi olulu aika adokogo saka osang kanga junga mejangjatep tashi maoksai alitsü mepishir, ta Wapangtoshi-isa sangdong nung shia lir.
“Arogo balala aser kijatemi Chennai nung aliba Naga nunger asoshi sarasademtsüba atema kanga pelar aser maneni onok asoshi sarasademjangma” ta paisa shisem.