Central Nagaland Tribal Council state jenjang nung tentetogo

Dimapur, Decemer 8 (TYO) : Central Nagaland Tribal Council (CNTC) kümteter küm asem abensaba anogomung nung Mongulbarnü Ao Senden, Lotha Hoho aser Sumi Hoho lennirtemi CNTC state jenjang nung tentetba osang metetdaktsü.
Mongulbarnü Lotha Hoho Ki, Dimapur nung Ao Senden Tir Imolemba, Sumi Hoho Tir Toniho Yeptho aser Lotha Hoho Tir Mhao Humtsoe nungeri külem alizüng tongtettsü atema kin asemsanger tsüngda yimjung nung yariteptsü aser tanga kintem asoshi tatishitsü südaktsütsü tayongzükba agütsü.
CNTC tongti tezülur Imtinochet-i CNTC tentetba indang osang tatsü agi metetdaktsüdang, Nagaland nung kin balalai parnok taginüba nung ajemdaker shilem lemsar teloktem tenteta aoba agi CNTC sabang ya tentettsüsa aküm.
Kin balala sasep nung telok tenteta aoba agi tongti kin asem – Ao, Sumi aser Lotha nunger züngdoka toktsü aser iba jagi kin asem taginübatem tongtettsü asoshi aser ano Nagaland nung aliba tanga kintem tsüngda aser Naga nunger tsüngda liromedem lidaktsütsü nükjidong nung CNTC tentet, ta CNTC tongti tezülurisa metetdaktsü.
CNTC tentetba nükjidongji telongjem, kin o kin tsüngda tesentaktep aser teyaritep atema lir, ta paisa ashi.
Tanü agiba sentong nung kin asem nungi nübo pungugu agi akümba züngsem 15 CNTC interim council body ka tentettsü atema tenüng jateta shim.
Sentong nung Rev. Dr. Robert Kikon-i temoatsü meshia sarasadem, Hokiye Yeptho-i Tir o jembi aser Rev. C. Walu Walling-i tenüngsang agüja sarasadem.