Tamangba lokti balala tsüngda raraba ajemogo: Kiren Rijiju

New Delhi, December 09 (Agencies): Tesüiba kümtem nung nütsüng ajema aliba tamangba loktitem anema tesempa nung raraba tatalokbatem ajemogo, ta tanü sorkari Rajya Sabha senden nung metetdaktsü.

Nütsüng ajema aliba tamangba loktitem anema tesempa nung raraba tatalokbatem züiner asü (?) ta asüngdangba telangzüba agütsüdang Minister of State for Home, Kiren Rijiju-i yamaji langzüa liasü.

Ano tanga tasüngdangba ka langzüdang Rijiju-i, 2014 aser 2015 küm tamangba lokti tsüngda raraba tatalokbatem ajema kümogo, ta ashi.

Minister-isa, 2014 küm linük nung tamangba lokti tsüngda raraba tatalokba 644 liasü, aser iba mapang nung nisung 95 asü aser nisung 1,921 yiru, ta ashi.

Paisa, 2015 küm October ita tashi nung tamangba lokti tsüngda raraba tatalokba 650 liasü, aser iba mapang nung nisung 84 asü aser nisung 1,979 yiru, ta ashi.

Ano UP, Dadri nung lokti kati Muslim nunger ka tepsetba dak sentakba tasüngdangba ka langzüdang Rijiju-i, October 15, 2015 nü Uttar Pradesh sorkari agütsüba osang nung ajemdaker, September 28-29 ayaterm mapang tamangba lokti ka nungi züngsem kar par kidang jagi atu. Tepsettsü nokdangba shiruru ka tepset ta tai tonglokja par jabaso tena dak azük, ta ashi.

Paisa, tena rongnung ka asü, aser state sorkari nisung 10 anema ken o benokogo ta osang agütsüogo, ta metetdaktsü.