BST-i Mokokchung nubur dang benjong tepela lemsateper

Mokokchung, December 8: Mokokchung town küm 125 ajungba benjongmong nung densema aser nüburtem dang Christmas aser küm tasen lemsatepa Benpuluin Semchir Telongjem-i Kumlong ward yimjak National Highway (Mariani road) nung banner ka inoktsü.

Iba banner ya, highway nung senzüsenbonger aser Mokokchung nung alir senso ajak dang Tsüngrem temeim aser benjong tepela lemsatepba tamaitsü ama ka lir.

Asür Benpuluin ya Kumlong ward kümteter (pioneer) rongnung ka lir, aser pa akümli aliba mapang nung nübur tenzükba wadang nung kanga dang nendaka inyaka aser nübur yaria liasü.

Par semchir-semnurtem koba Benpuluin Semchir Telongjem (BST) nüngtem nung telok tenteta lir, parnoki Kumlong ward atema lenla aika nung yimten aser arogo den teka amtepa nübur ajungtsü asoshi inyaka arur. Talisa Benpuluin Semchir Telongjem-i, kiyong nung aser Mokokchung town nung lanur ajungkettsü nükla nung, aser saisapong ya kangasa tongtipang ka ta tangatetba nung, küm shia December ita volleyball tournament ka – Benpuluin Memorial Volleyball Trophy – ta küm aika ayongzüka arur. Taküm küma iba tournament ya tan ita December nung alitsü sentong tulu nung renema lir.