Centre sorkari Manipur indang Bill 3 reprangshidar: Kiren Rijiju

New Delhi, December 09 (Agencies): Mongolbar nü Union Minister of State for Home, Kiren Rijiju-i, taküm August 31, 2015 nü Manipur Assembly nung agizükba bill asem Centre sorkari reprangshidar aser itemji sentaktepa aliba ministry balala teyari agia reprangshidar, ta metetdaktsü.
“Taküm August 31 nü state legislature-i agizükba bill asem sorkari dangi arua lir aser Tir nem agizükdaktsütsü atema Manipur Angh ket nung lir,” ta Rijiju-i Lok Sabha nung ashi.
Paisa, item department tem teyari agisema Centre sorkari bill asemji reprangshir, ta ashi.
Nagaland MP, Nephiu Rio-i item bill asemji koba jenjang ka nung lir, aser sorkaria Manipur kübok tenemlen alirtem taginübaji angateta lir asü mali(?) ta asüngdangba langzüdang Rijiju-i yamaji langzüa liasü.
State assembly nung agizüka aliba bill asemji – Protection of Manipur People Bill, Manipur Land Revenue & Land Reforms (Seventh Amendment Bill) aser Manipur Shops & Establishments (Second Amendment) Bill lir.
August 31 nü Manipur assembly nung Bill asemji agizükba sülen state nung tribal nisung 9 tashi süogo. Item Bill asemji Centre sorkari magizüktsüla ta nisung noklang aikati linük yimtiba, Delhi nung ita ka dak tema takhangba agüja lungkak aitogo.