Maruti Suzuki nung sen 20,000 tashi atutsü

New Delhi, December 10 (Agencies): Maruti Suzuki-i, parnoki yangluba garitem nung January 1, 2016 nü nungi sen 20,000 tashi atutsü, ta Brishostibarnü metetdaktsüogo.

Company nung otongdar kati ashiba agi, alima nung India sen jenjang ajema akümba ajanga sen atutsüsa küma iba telemtetba agi, ta metetdaktsü.

“Dollar dang nungi India indang sen jenjang kanga agi tajemba akümba ajanga kechisarena nung sen tali nüngdaka akümer aser ibaji ajanga sen atutsüsa aküm,” ta company nung otongdari IANS dang ashi.

“Tang sen atutsü lemtetba ya January 1, 2016 nü nungi mapa küma aotsü aser model balala atema sen jenjang atuba yimya balala asütsü aser timba atubaji sen 20,000 tashi alitsü,” ta pai ashi.

Hyundai Motor India-ia January ita nungi parnok indang garitem nung sen 30, 000 tashi atutsü ta Bodhbarnü metetdaktsüogo.

“Market nung tang ama kanga toktepba tensa ka nung sen atutsüji kanga shisadanger lemtet kechiba süra India sen tashi mait akümba ajanga onoka oset alitsü asoshi sen tali nüngdaka akümer,” ta Hyundai Motor India nung senior vice president for sales & marketing Rakesh Srivastava-i ashi.

Tang ya market nung sentsüh aliba aser ‘foreign funds’ onsara aoba ajanga India sen kanga tashi mait kümogo.

Bendang linük nungi ‘invester’ temi India market nung tang ya oset ayoktsü kanga arisanger kechiba süra December tom nungibo US nungeri sen tetemlok atutsü.