Eid tenüng nung yimtenren lenirtem chiok:Syria

Damascus, July 18 (Agencies): Syria ketdangsertemi Eid al-Fitr benjung tenüng nung puoka alir nisung 200 dak tema tepuokdak nungi chiokogo, ta lawyer kati AFP dang ashi.
Hokolbar nü chiokertem parnok 240 rongnung tetsüra aika densema liasü, ta attorney aser meimchir temeten asoshi inyaker Michel Shammas-i ashi.
Syria tepuokdak ayur timba ka, kiralongra anemba den sendakba aser March 2011 nungi tenzüka Syria sorkar anema apusoba meji puokba lir.
Britain nung amena aliba, Syrian Observatory for Human Rights osang ajanga ka parnok chiokba osang metetdaktsüogo saka parnok osang ajangabo nisung 350 chiok, ta metetdakja liasü.
Ashiba agi tepuokdak ayur timba ka sorkar anema lungkak aitba mapang apurtem lir.
“Syria nung ketdangsertemi Damascus anasa aliba Adra tepuokdak tesem nung parnok 240 chiokogo, parnok ya timba ka kiralongra anema nokdakertem lir,” ta Hokolbar nü Shammas-i AFP dang ashi.
Parnok tan chioker rongnung Syria nunger blogger Hussein Ghreir-a dena lir. Pa aser pa den külem activists Mazen Darwish aser Hani Zaitani nunger ya, kiralongra mapa ajungkettsür, ta tonglokja 2012 küm February ita nung apuba lir.
Osang kar ajanga ashiba agi, Syria sorkari tepuokdak ayur ajak senteper parnok 200,000 shi lir. 2011 küm nungi tang tashi nung sorkar tepuokdak tesem nung tanur aika dena parnok nisüng 13,000 tashi kanga reshi kangshia südaktsüba otsü lir.