Tanü Japan PM aser Modi nati Varanasi semdangtsü

Varanasi, December 11 (Agencies): India aser Japan linük na küm noklang aika tesentaktep nung ano mera tasen ka agia Ato kilonser, Narendra Modi aser Japan Ato kilonser, Shinzo Abe nati asüng (Honibar) akhi mapang tekülem ki semdangtsü, ta osang ka ajanga ashi.

Yaküm August ita nung Ato kilonser Narendra Modi-i Japan semdangba mapang Kyoto (Japan) aser Varanasi yimti na tsüngda ‘Partner City Agreement’ tezüngzüktep agia liasü.

Japan lenir Abe-i tanü nungi tenzüka anogo asemnü India semdanga arua lir aser asüng Modi tena ‘Ganga Arti’ (temeshi ayong nung aliba Dashashwamedh Ghat nung tekülem) nung adentsü.

Iba ayong nung ‘pontoons’ amshia khen atema sabang tuluka yangluogo, aser itemji Allahabad High Court nungi temelaba agia yanglu.

Army aser Navy sepaitemi iba sabangji anüktsü aser iba sabang nungjagi linük ana Ato kilonseri iba sentong reprangtsü.

Akhi mapang tekülem yimti Varanasi ya Sarnath nungi kilometer 15 shi dang pilar lir. Iba tesem nungyagi Buddha-i mezüng sayutsüngi liasü. Iba tesem ya Buddhist nütsüng aika aliba South East Asia linüktem aser Japan atema tamangba aser sobaliba tesem ka lir.

Modi aser Abe na tsüngda tesentaktep junga lir, aser iba temaitsüji tena indang twitter osangtem ajanga sayur.

Tanü Ato Kilonser Modi-i, Abe ya India tembar tajung ka aser nüngtugu lenir ka, ta ashi.

“India-i tembar tajung aser nüngtugu lenir PM @AbeShinzo agizüktsü renema lir. Pai semdangba ajanga India-Japan tesentaktep ano tajungba akumtsü,” ta tanü Modi-i twitter ajanga ashi.

Lenir anati Varanasi yimti ketdangsertem den-a o lemteptsü akok, iba sülen linük yimtiba Delhi-i meyipa aotsü.

Lok Sabha election nung Modi-i Varanasi nungi toktepa liasü, aser pa Ato kilonser akumba sülen pai iba yimti aiben semdangogo, ajisüaka bendang linük lenir ka den külemi iba yimti semdangbabo tang mezüng asütsü.