Mizoram nung yi jemer aser ayokertemi Arogo nung shilem magitsü

Aizawl (Mizoram), December 11 (Agencies): Mizoram Presbyterian Church nung telemtetba agiba tentet tuluba, Synod Conference-i yi ayokertem, yi alitsü aser ajemtsü atema temelaba alirtem Arogo maparen nung tongti shilem magidaktsütsü lemtetogo.
Iba onükji Presbyterian Arogo tenet-i benoka liasü aser Synod Conference nung Mizoram Synod onir, Rev. H Lalrinmawia leniba nung o lemtepba sülen Synod Conference züngsemtemi iba onükji agizükogo.
Taküm January 15 nü nungi tenzüka state nung Mizoram Liquor Prohibition and Control Act, 2014 benoka lir, koba ajanga state Excise & Narcotics department-i agütsüba permit alirtemi yi alitsü aser ajemtsü melar.
Iba Act ajanga 1997 küm February 20 nü Mizoram Liquor Total Prohibition Act, 1995 ozüng tesashi benoka aliba melena liasü.
Synod Conference-isa, Presbyterian Church züngsem kati soseta süra local Arogo indang tsüngtsüng atemtsü lemtetogo. Tamalenbo soseta asürtem atema Arogo lenirtemi asüpila sentong makatsüi liasü.