GNLA-i pur aoba Meghalaya police constable mang nguogo

Shillong, December 12 (Agencies) : Ita ka tejakdang Garo National Liberation Army (GNLA)-i pur aoba Meghalaya police constable indang tasümang nguogo.
Honibarnü North Garo Hills district kübok Ronrong yimtsüng nung mangji ali nung rema aliba tutetogo, ta police ketdangser kati ashi.
Arishi küm 36 tain Khomraj Bhattrai ya East Garo Hills district nung mapa lemzüka liasü aser November 6, 2015 nü Thapa Darenchi yimtsüng anasa Musulu Ali ta ser nisung ka den pa külemi pur ao.
Ali ya Assam kübok Goalpara district nung alir aser pabo November 19, 2015 nü chiok.
Khomraj Bhattrai pur aoba nungsa pa tepset asütsü südi ta police-i temulung melemi bilemer. Pa mang rangsa reprangtsü atema Mendipathar-i bener ogo aser asüng par kinünger ket nung agütsütsü, ta police ketdangserisa metetdaktsü.
Ano külen, police-i aputsü bushiba GNLA telungpurtem ka North Garo Hills district nung pa sasa police ket nung bendang agütsü. Pai 7.65 mm pistol ka den injang kar bener arua police nem agütsü.