Shi o tanüla na

Asenok taküm ya shi aser tanüla na agi küma lir, anungji shi o tanüla na prongla kanga tashi itta alitsü nüngdaker. Aiben, shii jangrabaji tanüla anema asütsü, ajisüaka tanülai teti pa mulungba nung shi temangji lidaktsüner. Shi temang yabo alima tesem ka nung dang alir saka tanüla yabo ajak nung alir, anungji shi tenük agi manguba lendong aser temoatsütem tanüla tenük agibo angur. Shi temulungjang agi Tsüngremi mulungba mangatetter saka tanüla mulungjangi dang Tsüngremi aginüba meteter. Mapang ka nungbo nü shi temang kanga belemadoker mejangnütsüa akok saka nü tanülaibo memejangi saksalema sarasadema atatsü ajungshitsü akok. Ashiko, tanülai ashibaji mangai temang shii aginüba amai mejangadokra tasüba lendongang ajurutsüa akok. Iba jagi, Yisu asütsüba mapang aser anogo tonga arudang, Yisui kaonung Pa nütsüngtem dang ashi, ‘ nenok tatidang nung metsüktsü asoshi sarasademang aser saksalema liang. Atangji, nenok tanüla agibo jangrar saka shi nung tashi mait.’ ( Mark 14:38). Iba Laishiba tekong ya azüng dang, tanüla agibo jangrar saka shi nung tashi maitbaji asenok taküm nunga kechisa asütsü ta asenoka peisasa asüngdangtsüsa adoker. Yisui pa aser pa nütsüngtem dak mapang tatsüka tsüngda nung kechi ataloktsüar meteta liasü. Iba ama mapang ka nung Pa tanüla aser shi nung kanga timtema liasü. Aji oda, parnok jakdang tatidang lendong jenti nenjunga aruba ngua, Yisui par nütsüngtem dang tatidang nungji metsüktsütsü atema tashi tasen meshia sarasademtsü ayongzük. Ajisüaka, par nütsüngtemi tanülai mulungba ama meinyaktet. Parnoki parnok tesayuri ashiba ama sarasademtsü melen shi jangraba mekoki amui oa adok. Ashiko, parnok temulungjang nungbo parnok tesayuri ashiba ama amang piyong sarasademtsüla ta jembir asütsüa akok, saka parnok kanga anünü aser amui mao maremtet, ibayongji ken dang masü asemben tashi Yisu aruba mapang parnok amui orr liasü. Alima otsü nung kanga lendong tulu aser kanga tongtipang atalokba mapang ka nung amui aortemji Yisu nütsüngtemji liasü. Shitakba agi Yisu nütsüngtemi Tsüngrem dang par tesayur taküm kümzüktsü asoshi dena asüngdanga sarasademtsüba mapangji ibai liasü. Ajisüaka, sarasadema atatsü melen amui oa adok. Tanü tendaka asen taküm, kibong aser lokti nung aiben tanülai jangraba ama shi nung meinyakteter. Tanülaibo asen apuani atema sarasademtsütsü ashir, asen tanurtem atema sarasademtsütsü ajungshir aser kinünger, medemer aser yimtsüyimertem atema sarasademtsütsü jembir saka asenoki mapang magütsüteter mesüra amuiang oadoker. Yisui asenok asoshi tebu dang sarasademtsür aser yamaji Pai asenoka Pa den külemi sarasademdaktsüner.  Yisui ashiba angatsü asoshi aiben asenoki timtem aremtsüla. Aiben memejangi mesüra mechiyongi sarasademtsü asoshi tanülai ajungshitsüa akok, idangji asenoki tashi angaa inyakra asenok asoshi temoatsü asütsü. Shi temang lendongi maitsü aser tatidang nung metsüktsü asoshi teti tanülai asenok dang sarasademtsü ajungshir. Asenoki aiben tanülai ashiba mangai shi jangraba mapatem nung dang mapang endoker. Tanülaibo sentepi aotsü, tenla agütsütsü aser temeim mapa inyaktsü ajungshir saka asenoki shi jangraba mapatem nem dang kokdatsür aser asen rongsen aser mapang ajunga tanülai mulungba nung masü saka shi jangraba mapatem nung endoker. Iba jagi tatem nung tamakok, tejashi aser tazüngla nung asen taküm atemer. Laishibai ashir, nü mulung ajak agi, nü tanüla ajak agi aser nü tashi ajak agi Kibuba nü Tsüngrem meimang (T.Kunem 6:5). Tetezü asen shi temang aser tanüla ajak agi asen Kibuba Tsüngrem, Yisu Khristai ashiba angatsübaji asenok alima nung alirtem asoshi kanga tongtibang lir. Aji oda, asenok shi temang aser tanüla anaprongla kasasa tashi itta alitsübaji iba Tsüngrem o ajanga asenok den jembir.