US court kati Modi indang visa kaket ajak sayutsü tuyur

Washington, Dec. 12 (Agencies): United State federal judge kati State Department dang, Obama’er ketdangsertemi India Ato kilonser Narandra Modi US semdangtsü nokdanga aliba agienba kulikaket ajak 2016 küm February ita tashi nung agüjang, ta tuyuogo.
December 9, 2015 nü New York nung Southern District judge John G. Koeltl-i tuyuba nungji, “2016 January tom tashi nung State Department-i mezüng bushiteta alibatem agütsütsü, iba sülen bushitetbatem 2016 February tashi nung agütsütsü.” ta shia lir.
Narendra Modi Gujarat Chief minister inyakba mapang 2002 küm Gujarat rara nung pai shilem agi ta tai tonglokja aliba dak sentakba nung tamalen Modi nem raliwalir visa agüja alibaji 2005 küm agiena liasü.
Iba ken o nung taruba sendenji February 29 nü akatsü, ta paisa tuyuogo.
Ajisüaka yaküm Lok Sabha election nung takok tulu ngua May ita Modi Ato kilonser akümba mapang US Tir, Barack Obama-i ilonga pa nem tenüngsang agütsü aser pa US-i jaoka liasü. Iba sülen Modi-i US anaben tashi semdangogo.
Tamangba yimsu sademsadema amangba dak sentakba US ozüng nung US visa magütsübaji Modi mezüng lir. Ajisüaka pa Ato kilonser akumba sülen iba tenokdangbaji (visa) agien, kechiyong sorkar tekolaktembo iba ozüng küboki maiter.
Freedom of Information Act (FOIA) kübok 2013 June ita nungi tenzüka Modi indang visa kakettem meshiba State Department-i magütsütetba sülen taküm September ita nung US nung aliba temeten telok, Sikhs For Justice (SFJ)-i temepishiba ka benoka liasü.
US Court teyari meshia SFJ-i, “USDOS defendant 2005 shi-i tamalen INA section 212 (a)(2)(G) kübok Narendra Mdoi nem B-2 tourist visa agüja aliba agien, kechiyong bendanger sorkar ketdangser ama inyakdang tamangba yimsü sadoka amangba alema kanga sashia Modi-i inyaka lir, koba ajanga pa United States-i aitsü metemsüi liasü,” ta ashi.
Yaküm August ita nung SFJ-i FOIA kübok Bush (taoba US Tir) aser Obama ketdangsertemi Modi US telungi aittsü nokdangtsü aser melatsü lemtetba dak sentakba nung onük tenet nung tezüluba tenet meshia liasü.