Etihad Airways-i award asem angu

Abu Dhabi, December 13 (Agencies): Etihad Airways küm tenet buba atonga atonga ‘World’s Leading Airline’ award agizükogo.
World Travel Awards tatembangba sentong, Honibarnü akadang Etihad Airways-i ‘World’s Leading First Class’, ‘World’s Leading Inflight Entertainment’, aser ‘World’s Leading Cabin Crew’ award tem angu.
“Ano maneni Etihad Airways-i kanga bendanga agüja inyakba ajanga iba industry rangben atema konang nungsang bentsür aruogo. Onoki tan agi küm tenet buba ‘World’s Leading Airline’ award atonga atonga angur,” ta Etihad Airways nung chief commercial officer, Peter Baumgartner-i ashi.
“Iba akhümket senpet anguba ajanga onoki meranga inyakba agi alima nung ozü company tangar ajak dang tajungba süa temaba jenjangi atuba metetdaktsür,” ta pai ashi.
“Onoki kanga akhüm agüja Etihad Airways nem ‘World’s Leading Airline’ award tenetben buba atonga atonga agutsür,” ta World Travel Awards ngutetsang aser Tir Graham E. Cooke-i ashi.
“International voters temi United Arab Emirates nungi Etihad Airways-i nüburtem kanga junga anepaluba aser 21 century den peta tayimtsü renloka amshiba achiteta iba award asoshi shimtet,” ta Graham-isa ashi.