Parachinar nung nisung 22 pokset, nisung 55 yiru

Pakistan anüolentip tsütsü Parachinar nung tapoktsü tesashi apokdang  yiruba nisung ka nüburtemi anir aoba noksa nung angur. Pakistan aser Afghanistan arrtsülen atalokba lendong ajanga tang tashi nung tajemba agi nisung 22 shi süogo aser nisung 55 yirua lir, ta ketdangsertemi metetdaktsüogo.

Kuram Agency, December 13 (Agencies): Deobar nü Pakistan, Kurram Agency kübok Parachinar yimti nung bomb ka apokba lendong nung tajemba agi nisung 22 pokset aser nisung 55 shi yiruogo.
Kurram Tribal district yimtiba Parachinar ya Afghanistan den arrtsülen lir, aser iba bomb lendong nung yirua alirtema karbo asütsüa akok.
Bomb ji shishilembaba tesem ka nung apok aser yangji asükwa atema tebur aika second-hand süoshi alitepa liasü.
Bomb apokba sülen security sepaitem iba tesem jagi oa nisungtem ainshidakja kuli bendenogo.
“Tajemba agi nisung 22 süogo aser nisung 50 dak tema yiruogo,” ta Kurram yimtenren ketdangser, Amjad Ali Khan-i ashi.
Lendong atalokba tesem nungi melung melemteti nisung ana puogo, ano külen police-i ashiba agi, bomb ji süoshi talep ka nung miima liasü.
Yirua alirtem anir oa anepaluba hospital doctor kati dang AFP ashiba agi, yirua alir timbaka kanga mejungi lir, anungji karbo asütsüa akok.
Bomb pokdaktsüba atema tang tashi nungi telok katia tenüng agia mali.
Asükwa indang second-hand süoshi ayokba tesemji Parachinar jilai ayaoka aiba tesem nung lir, aser iba ya Kurram Agency indang tongti yimti lir.
Iba osang angashia Pakistan Ato kilonser Nawaz Sharif, Interior Minister Chaudhry Nisar, Chief Minister Punjab, Shahbaz Sharif aser Jamaat-e-Islami (JI) tongti, Siraj-ul-Haq nungeri sashia aitsüba den külemi asürtem kibong den asüko osang lemsatepogo.
Kurram ya Pakistan indang semi-autonomous tribal district tenet rongnung ka lir, aser item yimti nung lisopur ozüngtem aser sobaliba ozüng benoka yimsüsür.