BJP-i Satra ali nung kuli agütsütetra ni menden toktsütsü: Gogoi

Guwahati, December 13 (Agencies): Deobar nü Assam Chief Minister, Tarun Gogoi-i, temzüng alema bendangertemi state nung Vaishnavite Satras (monasteries) ali atsüngba kuli BJP-i agütsütetra pai chief minister menden toktsütsü, ta ashi.
Dispur nung osangbenertem senden ka nung jembidang Gogoi-i, “Bendanger kati danga Assam nung Satras meyong ali atsüngba kuli parnoki (BJP lenirtem) agütsütetra ni menden toktsütsü mesüra parnoki anentsüla. Satra ali atsünga mali aser tang tashi nung Satra (monastery) shingaia parnok li bendangertemi atsünger ta benoka mali,” ta ashi.
Tawa Assam unit BJP-i Tarun Gogoi-i aniba sorkar aija, Bangladesh nungi ozüng alema bendangertemi Satra alitem sashia atsünger, ta tai tonglokja liasü.
Chief minister-i, State nung Satra telungi Rashtriya Swayamsevak Sangh (RSS) aitogo aser Satras onük nung BJP-i politics asayar, ta aitsü.
Honibar nü Congress tatong Tir Rahul Gandhi-i roadshoow mapang Barpeta Satra semdangba tetshia Assam chief minister-i, BJP aser RSS-i Rahul Gandhi-i semdangba anemtsü asoshi akhi mapang Vaishnavite Satra tesem nung telok kar ajungmeso, ta ashi.
“Onoki iba ya metetogo. Rahul Gandhi-i semdangba anemtsü atema BJP aser RSS-i Honibar nü tetsür telok ka Barpeta Satra anasa amentsü ajungmeso. Ibaji ajanga Rahul Gandhi-i yashi (Honibar) pa indang roadshow tenzükdang Satra telungi mai. Ajisüaka tesülen pa arur telungi ai,” ta Gogoi-i ashi.
Honibar nü Barpeta Satra anasa tetsür telok kati Congress lenir Rahul-i puti otsü mongchen, Satra telungi mai aser Satra matsüngdang mapudaki road show tenzük, ta lungkak aita liasü.
Tesülen parnoki, küm 500 tain monastery telungi maiba ajanga Rahul Gandhi-i Assam nüburtem mezüngmeshiogo, ta aitsü.
Gogoi-isa, 2016 küm assembly election atongtsü lia BJP-i Congress anema osang tai proker, ta aitsüogo.
“(Onok anema) BJP onüktem mali, anungji election nung takok angutsü atema parnoki Congress anema osang tai proker. Parnoki kechisa inyakdir inyakaka onoki election nung takok angutsü, kechiyong Assam nüburtemji yimtenren tsütsü shisatsü nung tain,” ta Gogoi-i ashi.
“Tesüiba mapang Assam nüburtemi onok anema vote agütsü. Onoki iba election ya yimjung aser terenlok onük nung tokteptsü,” ta paisa shisem.