Nagaland Assembly ghonda tesadang ka agi

Chief Minister, T.R. Zeliang-i 12buba Nagaland Legislative Assemby session 10 buba nung asürtem bilemtetba noksa nung angur . Kohima, December 14, 2015.

Kohima, December 14 (TYO): Hombar nü tang mezüng opposition makai asükwa mongpu 12 buba Nagaland Legislative Assembly (NLA) senden yangi Assembly Secretariat nung kaogo.
Taoba November 20 nü Congress MLA 8 Naga People’s Front (NPF)-i aniba DAN sorkar nung adenba yong züngsem 60 aliba House nung opposition mali kümogo.
Tang Assembly nung NPF züngsem 48, BJP 4 aser Independent 8 lir. BJP ya election matongdang NPF den loktepba party lir aser Independent MLA temia sorkar pusemdagi.
Tanü senden nung MLA 60-i sorkar department 82 anema tasüngdangba kecha maliasü, ibaji ajanga iba sendenji question hour tazüngla liasü.
NLA Speaker, Chotisuh Sazo-i, temzüng nung ajemdaker assembly first hour ji tasüngdangba aser telangzüba agütsüba mapang asütsüla, ajisüaka iba senden atema tasüngdangba kecha mangu, anungji senden nung tanga onüktem benoka jembitsü, ta metetdaktsü.
Senden nung tongtibang nisung asür trok bilemteta liasü, sorkar Bill asem state Angh-i agizükba metetdaktsü aser sorkar osangtem aser temzüngtem agizüka ayu.
State Angh, P B Acharya-i Nagaland Protection of Interest of Depositors (in Financial Establishment) Bill 2014, Nagaland State Legislature Members (Removal of Disqualification) First Amendment Bill, 2015 aser Nagaland Appropriation (No. 8) Bill 2015 agizükogo.
Tasembuba bill ji July ita Assembly senden nung 2015-16 küm atema budget sen crore 12,592.69 agizüka ayuba dak sentakba bill lir.
Item bill agizükbaji Commissioner & Secretary NLA, N. Benjamin Newmai-i zünga metetdaktsü.
Chief Minister T R Zeliang-i taoba Tir asür Dr A P J Abdul Kalam bilemteta liasü.
Pa taküm July 27 nü Indian Institute of Management, Shillong kaketshirtem den tejembitak nung temulungjang tashitak atua Nongril Hills nung aliba Bethany Hospital-i anir aoba sülen asü.
Zeliang-isa taoba mapang Nagaland Angh, asür Lieutenant General (Retd) V K Nayar bilemtet. Pa ya 1993 October ita nungi ita 10 state Angh inyak. Nayar November 30 nü asü.
House Leniri asür Khekiho Zhimomi bilemtet, pa ya Nagaland nungi Rajya Sabha züngsem teinyaktak liasü aser taoba November 26 nü temelungjang tashitak ajanga pa All India Institute of Medical Science, New Delhi nung asü.
Assembly Speaker, Chotisuh Sazo-i taoba mapang State Assembly züngsem asür Bongnao, asür L J Toshi Sangtam aser asür T Sentichuba nungera bilemteta liasü.
Assembly intercession mapang asürtem bilemteta akhüm agütsüba temaitsü minute ana süngjema mokrema liasü.
Ghonda ka tesadang tsüngda item maparen ajunga tembanga Assembly Speaker-i senden tembanga liasü.