Kerry o Lavrov nati Syria, IS & Ukraine ken o benoka jembir

Moscow, December 15 (Agencies): US Secretary of State, John Kerry-i Russia Foreign Minister, Sergei Lavrov den Moscow yimti nung tanü Mongolbar ajurutepa tongti senden ka menogo.
Ukraine den sentakba ken o nung mangatettep adoka par linük ana tsüngda tesendaktep mejungi kümaka, alima tensa tajungba kümdaktsütsü mechi par linük anati külemi lungjemer inyaktsüsa akümer ta tangatetba yur külen lenir anati tanü ajurutepa senden amenba osang jangjaogo.
Tanü senden nung lenir anati Syria, Islamic State (IS) aser Ukraine den sentakba onüktem benoka jembia liasü.
“Asen linük ana tsüngda mangatettep adoka tensendaktep mejungi kümaka, asen linük anati lungjemer nungdakba maparen inyaktsüsa akümer,” ta taküm küm tenzüker tan agi Russia tanabenbuba semdangsang, Kerry-i tanü senden nung metetdaktsü.
Ukraine ken o bentettsütsü maparen nung US-i nungdakba teyari agütsütsü nükjidong nung US Tir, Barack Obama aser Russia Tir, Vladimir Putin nati ayongba jembiteptsü senden maneni amentsü mulungba olen ka Lavrov-ia lemsatepa liasü.
France kübok Paris yimti nung yashi, Hombar nü amenba Ministerial Talks senden nung shilem agiba sülen Kerry-i tan Moscow semdanger lir.
US kübok tan Hokolbar nü amentsü ayongba International Syria Support Group (ISSG) senden takok ngua amentsüsa Russia-i tongti shilem agitsü tajungshiba olen ka Kerry-i tanü metetdaktsü.
Syria nung mangatettep adoka tongpang raraba telok rong nung yimjung tezüngzüktep agia par linük nung yimtenren tebentetbaren bener arutsütsü nükjidong nung tentetba ISSG telok nung Russia-a densema lir.
Ajisüaka, Tir, Bashar al-Assad nem Syria lenisütsü menden maneni bendaktsütsü mesüra pa lenisütsü menden nungi anentsütsü onük nung Russia o US na o mebangjemtetti aliba osanga jangjaogo.
US-i aniba alima teloktep mitkartem aser Russia mitkartem napronglai Syria nung tentetba telungpur aser kiralongrar teloktem anema raratsü tenzüka lir saka Russia-i kiralongrar amaktsü dak atemer Syria sorkar anemertem ang amaker ta shia, US densema, West-i Russia aija lir.
Ano, Ukraine sorkar aser sorkar anemer na tsüngda agiba Minsk yimjung tezüngzüktep mapa küma inyakdaktsütsü atema Russia-i nungdakba maparen inyaktsü tajungshiba olen ka Kerry-i metetdaktsü.
Kerry-i Lavrov den senden amenba sülen Tir Putin dena ajurutepa senden amenba osang jangjaogo.