CBI-i kü office nung mita reprang: Kejriwal

New Delhi, December 15 (Agencies): Central Bureau of Investigation (CBI)-i Finance Minister Arun Jaitley meyong file ka reprangdang kü office mita reprangba maparen aitsür, ta Delhi Chief Minister Arvind Kejriwal-i Mongulbarnü ashi.
“Shitakbabo parnoki kü dak tenük yoker,” ta pai ashi.
Ajisüaka CBI-i Kejriwal office nung ibala mapa meinyak, ta ashidang pai CBI ketdangsertemi teyazü kuli agütsür kechiba süra parnoki kü office nung mita reprangogo, ta ashi.
Kejriwal-i, “Pa indang office nung file küm 10 nungi 15 tejen ka danga mayor. Parnok 2007-2014 tashi indang file bushir süra kü office nung kechi reprangerba asü?” ta asüngdang.
Parnok shitakbabo ozüng alema benshiba ken o dak sentakba nung Delhi & District Cricket Association (DDCA) indang inyakyim bushirba lir, ta pai ashi.
Jaitley ya DDCA den mapang talangka külemi inyaka liasü, ta pai shisem.
“Parnoki Jaitley dena inyakdang amshiba DDCA file nüngdanger aser ibaji bushitsü atema parnok kü office-i aru,” ta Deputy Chief Minister Manish Sisodia’er kima AAP lenirtem ajurutepba mapang osangbenertem dang pai ashi.
Parnoki nüngdakba file ji tesem shitak nung oa bushitsüla, ta pai ashi.
Ni teraksa maginer aser ozü tanuria aibelenra tepuokdaki yoktsü, ta paisa ashi.