Libya parliament lenirtemi UN yimjung onük magizüker

Geneva, December 16 (Agencies): Libya nung tentetba parliament 2 lenirtemi United Nations (UN)-i benokba yimjung onük magizüktsü lemtetogo.

UN-i ayonger külen Libya kübok Tripoli aser Tobruk na nung tentetba parliament lenir, Aguila Saleh aser Nuri Abu Sahmain nati aniba telok anati Switzerland kübok Geneva nung yashi, Mongolbar nü nungi tenzüka yimjung senden amen tenzüka lir.

Ajisüaka, par linük indang mangatettepbaren bentettsü maparen nung bendang linük aser alima tentet nem tongti shilem magitsütsü ta shia, lenir anati UN-i benokba yimjung tezüngzüktep zülutepa magitsü lemtetba osang jangjaogo.

Küm 1 tejaklen nungi tenzüka Libya nung sorkar ana tenteta tongpang rarabaren agientsü jangraba lenirtemi par telok ana tsüngda yimjung tezüngzüktep tanü, Bodbar nü agia teloktep Libya sorkar tentettsü sentong renema liasü saka iba sentongji melenshia, parnoki yimjung tezüngzüktep agitsü asoshi mapang tali meshisemogo.

“Libya’er mangatettepbaren bentettsü aser tangar nungi teyari magi ozü mangatettepbaren onoksasa bentettsü ta alima dang sayutsü nükjidong nung onoki senden amen tenzük. Alima tentettem nungi teyari agitsüji nungdaka lir saka parnok mulungka nung ozü linük indang mangatettep ken o bentettsübo memulunger,” ta Tobruk nung tentetba House of Representatives Tir, Saleh-i tanü metetdaktsü.

“UN-i benokba yimjung onük kanga junga bilemdangtsü nangzüker. Ajisüaka, tan senden ya Libya nüburtemi peisasa mangatettepbaren bentettsü asoshi sabang renemtsür ama bilemdaktsüner,” ta Tripoli nung tentetba General National Congress Tir, Sahmain-ia metetdaktsü.

Taoba Libya lenisang, Muammar Gaddafi lenisütsü menden nungi tashiyim agi atsüngdokba sülen Libya yimsütsü tashi abentsü nükjidong nung sorkar ana tashi tenteta Libya nung tang tensa kanga mejungi lir.