Khristan taküm yimya

Nisung ka kodang Yisu nütsüng kümdir mesüra Khristan kümdir, pa mesüra laji kija alitsü atema masü saka tangar atema alitsü shimtet ta metettsü junger. Tangar tamangba yimsü amanger karbo tai memenatsü atema nisungtem nungi pilaa arem nung alitsüa akok mesüra tenla kidang dang moka alitsüa akok. Ano, tamangba yimsü kar nungbo tekülemdak orr tenla tera agütsüra iba jagi pei tsüngrem dak amangba maparen ajak peridaktsür ta bilema inyaka alitsüa akok. Ajisüaka, Khristan sobaliba aser taküm yimyajibo pei kija ajungtsü atema masü saka tangar nüngdakba purtem den külemi lia yariteptsü asoshi lir. Khristan taküm ka süaka kodang asenoki tai menar, iba jagi asen dang masü saka asenok den alir ajak timtemdaktsür. Iba amaji, kodang tangar Khristan taküm aser kibong nung timtem ataloker asenok daka kongshir. Mapang ka, kodang Korint lima nung alirtem tanüla nung kanga tashi mait liasü, ibaji metetter tenyar Paul yongyima mekazütet. Oagi Korint lima nungji tiyazü tesayurtemi amangba purtem mashileni aniba osang kodang pai angashi, pa mulung nung kanga jashia liasü. Ibayongji, pai Korint arogo nung amangba purtem dang parnok rongnung tepela aser tejashi anogotem ajak nung külemi tepela aser tejashiji lemsatepa yariteptsü ajungshi. Iba jagi, 1 Korint 12:26 nung Paul-i yamai arogo nung amangba purtem dang ashi, ” tenüktelen ka kangshira, ajak kangshir aser tenüktelen ka aküm ketra, iba denji ajaki pelateper.” Ibaji Khristan telok yimya, Khristan telok  sobaliba aser teinyaktsü lir. Asenok maparen ajak nung kati ka yaritepa alir aser iba jagi asenok longjemdaktsür. Ashiko, aiben asenoki Tsüngrem mapa mazüngi inyakdang asen anasa alir timtem memetettsüa akok mesüra arogo nung shilem magitettsüa akok mesüra asen kibong kija indang bilemdang asenokji shinga dena longjema melii akümtsüa akok. Ajisüaka, asen meketa aliba amangba purtem pelatepdang mesüra jashitepdang, iba ama tensa tia jagi asenok dak mekongshira aser asenok oagi külem amangba purtem denji shilem magitetra, asen tamangba jenjang, yimya aser tangatetbaji ken meyipa reprangdangtsü junger. Khristan-bo Khristan saka asen dak tangar atema aria bilemba shisatsü ka melira ibaji Khristan jakla masü ta asenoki angatetdi. Asenoki Tsüngrem dang tangar atema khuretsa bilemtsütsü shisatsü meshidi aser tangar nüngdakba purtem yaritsü tashi meshidi. Ibajiang amangba purtem telongjem lir. Tenyar Paul-isa 2 Korint 11:29 nung ashir, ” Shiba tashi mait, nia tashi mait masü no ? Kodang kar temenen nung tsüker, idangji nia jashia akümer masü no ?” Khristan ka jakla aser mulungsentsüji ibaji lir. Asenoka Khristan saka tangar den asenoki tepela aser tejashi melemsatettetra, tebilemdangtsü aser temelenshitsü tuluka lir ta asenoki bilemdi.