“Ozü jala tenüng Jyoti Singh liasü” : Nirbhaya tetsü

New Delhi, December 16 (Agencies) : December 16 nü tebur telok kati shi nung tashiyim agi raksatsüla tetsüi lar jala nem tetushi agütsüdang, la tenüng yimjak nung metetdaktsüogo.
Iba ama tesempatsü aketba mapa inyakba nung takoksa ajururtem mesüra parnok kibongtemi masü saka mapa inyakertemiang nüma matangtsüla, ta tetsüi ashi.
Küm asem tejakdang December 16 nü Delhi nung tebur telok kati arishi 23 tain paramedical student tashiyim agi raksatsü aser iba tatalokba sülen anogo 13 lir külen la asü. Iba tatalokba anema public-i noktak aser nübortemi la nem tetushi agüja la dang ‘Nirbhaya’ (tasütait) ta tenüng jaloktsü.
Ajisüaka, tanü küm asem lir külen tetsürla tetsü Asha Devi-i kanga dang tasü itta lar jala indang tenüng yimjak nung metetdaktsü.
“Ozü jala tenüng Jyoti Singh liasü aser ni ibaji yimjak nung ashitsü maaker. Takoksa ajururtem mesüra parnok kibongtem masü saka tetsür shi nung tashiyim agi raksatsürtemiang aaka bilemtsüla” ta Asha Devi-i ashi.
Bodbarnü Jantar Mantar nung tetsür aser mulungtet telok kari ‘Nirbhaya Chetna Diwas’ ayongzüka agidang lai iba osang metetdaktsü.
Tanü agiba sentong nung Javed Akhtar, Shabana Azmi, Delhi Congress chief spokesperson Sharmistha Mukherjee aser tetsür atema tentetba telok aika Jantar Mantar nung adenshia tetsürla nem tetushi agütsüogo.
Tanü agiba sentong nungsa Nirbhaya’er tsürabur Asha Devi aser Badri Singh Pandey nati tena jala tashiyim agi raksaja tepseter nisung 6 rongnung tanubosang mechioktsü atema takhangba agütsü. Tanubosangji December 20, 2015 nü chioktsü sentong lir.
“Ozü jala tepseter küm asem ajungba mapang, tai tonglokja alir rongnung tanubosang chioktsüba lir. Iba nung kechi ochi obendang lir? Paji arishi küm 16 mesüra 18 ar ni memetet. Ajisüaka pai mapa tamajung ka inyakogo aser iba asoshi pa merenshitsüla” ta Asha-isa ashi.