Y Patton-i tetsür shishilembar tepsetba aitsür

Dimapur, Dec. 16 (TYO): Hombar nikongtsütsü Dimapur nung mejangjatetba nisungtemi tongtibang tetsür shishilembar Ritika Mehta tepsetba kukua aitsür, ta Home Minister, Y Patton-i sangdong ka nung metetdaktsü.
Ita ka tejakdang mejangjatetba nisung kari la taküm agitsü merang saka Tsüngremer taochi agi la kümzüka liasü. Nisung ajak Khristmas atema renemba mapang ka nung tetsür ka anema iba mapa inyakba atema süngmanga bilemer. Iba mapa ya nisung ajaki aitsütsüla, ta Y Patton-isa sangdong nung shia lir.
Nagaland nung Opposition Congress-i iba tatalokba ya yimten ken o kümdaktsütsü merangba aser Dimapur nung nisung tamajungtemi inyakba mapa asoshi ni telangzüba agüjang ta akhangba asoshi kanga sasa bilemtsür, ta paisa ashi.
“Opposition Congress-isa iba tatalokba atema Dimapur police aitsüogo saka asür Ritika dak mezüng lendong atalokli Dimapur City Commissioner-i la nem security agütsübabo parnoki memetet,” ta Home Minister sangdong nungsa shia lir.
Dimapur nung police-i kanga meranga mapa inyaker aser ibaji ajanga jila nung ozüng alema mapa inyakba shilem tuluka azüokogo.
Ozüng alema mapa inyakba ajanga kodanga yimjung aser telemtetba mongutettsü ta state sorkari nenshia metetdaktsür. Sorkari State Police dang aibelenertem pua merenshitsü tetuyuba agütsüogo aser Dimapur yimti aser Nagaland state ajunga nung tensa meraksadaktsütsü atema sorkari mapa inyaktsü, ta Y Patton-isa metetdaktsü.